Таулу хычинни ийиси узакъгъа жайылады

Гитче заманында китапланы бек сюйген, аланы къайда болса да олтуруп окъугъан къылыгъы бюгюнлюкде, уллу киши болгъанындан сора да сакъланады. Алгъын орус тилде жазгъан авторланы чыгъармаларын окъугъан эсе, арт къыркъ жылны ичинде немис, ингилиз тилни авторланы китапларын окъуйду. Предпринимательлик иш бла кюрешеди.

Дима жетмиш жыл мындан алгъа Харьков шахарда туугъанды. Мектепни, ызы бла уа анда университетни экономика факультетин жетишимли бошап чыкъгъандан сора, аскер борчун толтурургъа ашыргъандыла. Ол Германияда совет аскерлени тизгинлеринде къуллукъ этгенди. Борчун толтуруп къайтхандан сора уа, аладан узакъ болмай жашагъан, бир ариу  къыз бла танышады. Бир кесекден ата-анасына келин этип, алып келеди.

Ишлерге, юйюрню тутаргъа да керек эди. Юй бийчесини къарындашы Харьковда уллу банкладан бирине башчылыкъ этеди. Эгечине, Димагъа да анда иш табылады. Экиси да аягъы юслерине тынгылы тургъанларындан сора, бир ненча ашхана, ресторан, артыкъ уллу болмагъан банк да ачадыла. Аланы да тынгылы ишлете тургъанлай, Совет Союз чачылып, Украина да кеси башына эркин болады. Токъсанынчы жылла анда жашап, кеслерини ишлерин къурагъанлагъа артыкъ аламат жылла тюйюл эдиле. Акъшаякъланы юйюрлери Германия Республикагъа кёчерге келишеди. Дима мектепни, университетни да  айырмалы бошагъанды, ингилиз, немис тиллени да дурус билгенди. Харьковда иши да алгъа бара эди. Болсада банкларын, кафелерин, ресторанын да учуз багъалагъа сатып, кёчедиле.

-Не букъдурлугъу барды, Германияда  башыбыздан «апельсинле акъмагъандыла». Биринчи заманлада  къыйналыргъа тюшгенди: газетле, пицца ташыргъа, башха ууакъ-тюек ишлени тамамларгъа да тюшгенди.  Жашай келгенибизде, энчи иели телевиденияда ишлерге тохтайма. Кёп жылланы ичинде чабакъ тутуу жаны бла бериуню немис тилде  шарт бардырып тургъанма»,-деп хапарлайды Дима.

Артдан-артха тыш къыралда аягъы юсюне тынгылы сюелгенден сора, Акъшаякъланы Абдулну жашы Дмитрий  2004 жылда предпринимательлик ишни да къолгъа алыр мурат этеди. Хар зат да тап барады. Тёрт жыл да озгъунчу, эки къатлы  юй сатып алады. Ол тийреде уллу болмагъан ашхана да ачады. Жанындан сюйген таулу хычинлени анда этдирир ючюн, аш этиучю уста адамны Нальчикге  келтиреди.

Жашай баргъанда, юйюрге эки жаш тууадыла. Аланы бирине оналты, башхасына юч жыл толгъанда, аналары артха, Харьковха, къайтады. Къыйналса да, сабийлени уа ёсдюрюрге  керекди. Бирин окъуу юйге, башхасын сабий садха кийиндирип тургъанды Дима. Юй бийчеси уа Харьковда. Энди жашла  кеслери ишлеп, фатарла алып, алагъа кёчгендиле. Жашау, иш да тап къуралып баргъандыла. Болсада жашауда  къыйын, къууанч кезиуле да боладыла. Жарсыугъа, къыйынлыкъ соруп келмейди, 2017 жылда уа Димагъа къыйын ауруу тиеди. Насыпха, немисли врачла операция этип, аягъы юсюне саладыла.

Андан бери озгъан тогъуз жылгъа жууукъ заманны ичинде бир зат да болмагъанча, сау-саламат жашап келеди. Харьковда юй бийчесини юч этажлы уллу юйю болгъанына да къарамай, аны бла айырылмагъаны себепли, ай сайын  Германиядан минг бла жарым евро жибергенлей турады. Предпринимательлик ишин да андан ары бардырады, ол да анга тынгылы хайыр келтиреди. Тамата жашы инженер-механик усталыкъгъа юйренип, кесини ишин бардырады. Кичи жашы уа алгъан билимине кёре юристди. Аны бла байламлы энчи иели ишин къурар муратдады.

- Юйюмден узакъ болмай ачхан ашханамда таулу хычинни  ийиси кенгнге эшитиледи, кёпле  бек жаратадыла,- дейди Дима. - Алгъаракълада уа кесим да жашаууму немисли къыз бла байламлы этгенме. Ол да атасындан къалгъан  фирмаладан бирине иелик этеди. Мен да анда ишлерге тохтагъанма. Толтургъан борчума кёре тийишли хакъ алама. Бир юйюрлю болгъаныбызгъа да къарамай, хакъымы заманында тёлейди. Мында адет алайды: юйюр- башха, иш хакъ – башха.  Ол законду, аны бузаргъа кишини да эркинлиги жокъду.