Баш магъана – миллетле эм динле аралы халланы игилендириуге

Республиканы Жамауат палатасында Коммерциялы болмагъан организацияланы (НКО) советини президиуму  быйылгъа ишини планын бегитгенди. Билдирилгенича, энчи эс граждан-патриот юйретиуге, мамырлыкъны, динле эм миллетле аралы келишиулюкню кючлеуге, тин-ниет хазнаны мурдоргъа салып, кёп миллетли Россейде граждан бирликни сакълаугъа бёлюнюрюкдю.

Советни башчысы – палатаны Маданият, тин хазнаны сакълау эм асламлы информация органла жаны бла комиссиясыны келечиси Люаза Макоева эсге салгъаныча, НКО-ну Советин къурауну баш мураты -жамауат эм коммерциялы болмагъан биригиуле регионда граждан обществону айнытыугъа къошулурча, алагъа бу ишлеринде методика жаны бла, сора ала башламчылыкъларын жашауда бардыргъанда болушурча мадарла излеудю. Совет, андан тышында, организациялагъа ахча, административ, мюлк, къурау-техника, информация эм башха себепликни этерге, юйретиу семинарланы ётдюрюрге, жыйылыула къураргъа тийишлиди. «Бизни борчубуз НКО-ланы ишибизни не къадар тири къатышдырыуду. Аны бла бирге бизге тамамланылгъан ишлени качествосуна, аны эсеплерине сакъ болургъа керекди», - дегенди ол.

Бюгюнлюкде НКО-ну Советине 58 адам киредиле, ала граждан-патриот юйретиу, саулукълу жашау бардырыуну оюмларын жайгъан, къыйын жашау болумгъа тюшген адамлагъа болушхан, маданият хазнабызны сакълагъан, жандауурлукъ бла кюрешген жамауат биригиулени келечилеридиле, деп билдиредиле Жамауат палатаны пресс-службасындан.