Республикадан билдириуле

Къашхатауда - аламат стела

Къайсы шахаргъа неда элге кирген жерде кёзге илиннген тюрлю-тюрлю тийрелени неда объектлени айбатландырыугъа эмда тап этиуге арт жыллада уллу эс бурулады. Бу иш «Тап шахар болум къурау» къырал проектни чеклеринде тамамланады.

Къашхатауда аллай объект - стелады. Алгъаракълада аны тёгерегинде кырдык ёсюп, тийреси да кёз къарамны артыкъ къууандырырча халда тюйюл эди. Энди уа алайы тап эмда тынгылы жарашдырылгъанды, къашхатаучулагъа, тышындан келген къонакълагъа да аламат жер болгъанды, деп белгилегендиле КъМР-ни Къурулуш эмда ЖКХ министерствосунда.

Тийишли ишлени кезиуюнде алайда жангы шинтикле бла чыракъла орнатылгъандыла. «Кашхатау» жазыуну уа уллу, кеслери да ичинден чыракъла бла жарытылгъан харфла бла жазгъандыла. Дагъыда айбатландырыу эмда жашиллендириу жаны бла иги кесек мадар этгендиле.

Промышленностьну талай бёлюмюнде ёсюм эсленеди

 Къабарты-Малкъарда промышленность производствону ёсюуюн туура этген кёрюмдю быйыл январь айда 104,1 процентге жетгенди. Жарашдырыучу бёлюмледе уа ол 101,8 процент чакълы болгъанды, деп билдиргендиле республиканы Промышленность эм сатыу-алыу министерствосундан.

Предприятияла алыучулагъа ол айда кеслери чыгъаргъан товарладан 1423,5 миллион сом багъасына жибергендиле. Саулай айтханда уа, къумач согъууда, юс кийимле, компьютерле, улоула, прицепле, мебель чыгъарыуда, темир, электрон эмда оптика затла этиуде ёсюм жалчытылыннганды.

Кёнделенде садикни къурулушу тири барады

Келир жылны ахырына Къабарты-Малкъарда школгъа дери билим берген энтта да юч жангы учреждение ачыллыкъды. Ала бары да «Юйюр» миллет проектни чеклеринде ишлене турадыла, дегендиле регионну Къурулуш эмда ЖКХ министерствосунда.

Объектледен бири - Кёнделенде сабий садикди. Ол хазыр болса, анда жюз сабийни кечиндирирча онгла къураллыкъдыла. Аны къурулушу озгъан жылны ахырында башланнган эди, шёндю да тохтаусуз, тири барады.

Бу кюнлеге анда иги кесек иш этилгенди: къурулушчула садикни тийресин жарашдыргъандыла, мекямыны мурдорун къурагъандыла, тюп отоуларын да хазырлап, энди уа биринчи этажын къалап бошай турадыла.

Садикни ичинде хар неси да кенг, эркин эмда тынгылы боллукъду. Ол санда сабийле заманларын ойнап оздурурча, жукъларча отоулары, ашханасы, башха бёлюмлери да. Сора музыка бла кюреширча энчи зал да къурарыкъдыла анда.