Газ ючюн тёлеу низамны кючлендирирге келишгендиле

Къабарты-Малкъарда бла Чечен Республикада газ ючюн тёлеулени жыйыу не халда болгъаныны, сора тарифлени эмда налогланы юсюнден кёп болмай Нальчикде ётген жыйылыуда сёлешиннгенди. Ол темаланы сюзюуге КъМР-ни Правительствосуну Председатели Мусукланы Алий, Чеченни Правительствосуну башчысыны экинчиси Рустам Шаптукаев, РФ-ни Президентини СКОФ-да толу эркинликли келечисини орунбасары Владимир Надыкто, РФ-ни энергетика министрини орунбасары Пётр Конюшенко, экономиканы айнытыу министрини орунбасары Сергей Назаров къатышхандыла. Ресурсла бла жалчытхан компанияланы атларындан а кенгешде «Газпром межрегионгаз» биригиуню башчысыны экинчиси Юрий Пахомовский бла «Россети» компанияны келечилери болгъандыла.

Жыйылыуда айтылгъаныча, бюгюнлюкде кёк отлукъну Къабарты-Малкъарда 262 мингден артыкъ хайырланыучу алады. Озгъан жылны эсеплерине кёре, ала этген борчну битеулю ёлчеми азайгъанды. Ол алай бола баргъаны ахыр тёрт жылны ичинде эсленеди.

Борчланы ючден бирин а жылыу бла жалчытхан организацияла этедиле. «Газпром межрегионгаз» биригиу, низамны кючлендирир умутда, жылыу бла жалчытыуда Бир оператор къураргъа эмда бизни регионну къырал субсидияла аллыкъланы тизмесине къошаргъа чакъыргъанды. Ол ахча уа сагъынылгъан операторланы къоранчларын жабаргъа бёлюнеди. Сёз ючюн, Шимал Осетияда бла Дагъыстанда алай этгендиле.

Чеченде уа абонентлени саны кёбюрекди (320 минг); адамла анда газны багъасын узакъдан тёлеу амалны тири хайырланадыла. Анда да борчла аздан-аз бола барадыла, болгъаныны ючден бирин, тюз биздеча, жылыу бла жалчытхан организацияла этгендиле.

Кенгешде ол шартланы сюзгенден сора, болуму игилендириу жаны бла оюмла туура этилгендиле. «Газпром межрегионгаз» компанияны чакъырыуу бла КъМР-ни Правительствосу ведомствола аралы ишчи къауум къурагъанды. Айтылгъаныча, амалладан бири – хайырланыучулада «акъыллы счётчиклени» орнатыуду. Дагъыда Бир операторну къурауну юсюнден сагъыш этерге дегендиле.