Ёксюз сабийлени къайгъыларын кёрюп

Бу кюнледе  Черек районну администрациясында социал жумушла жаны бла ведомствола аралы комиссияны биринчи жыйылыуу болгъанды. Анда сёз ёксюз, къарар адамлары болмай къалгъан сабийлени фатарла бла жалчытыуну  юсюнден  баргъанды. Жыйылыуну  комиссияны таматасы Тареза Эфендиева бардыргъанды.

Комиссияны къауумуна  Черек районну прокурору, районда Билим бериу управленияда сабийлени болумларына жууаплы бёлюмюню башчысы да къатышхандыла.

Белгиленнгенича, бюгюнлюкге Черек районда ёксюз, къарар адамлары болмай къалгъан, жашау журт керекли жыйырма бир адам барды. Ведомствола аралы къауумгъа киргенле,  аланы хар бирини да энчи болумларын тынгылы тинтгендиле, андан сора законнга бузукълукъ этген шартла болмагъанларын да  чертгендиле.

Сюзюуню эсеплерине кёре, мындан ары тамамланыллыкъ ишле бла байламлы тийишли оноула этилгендиле, ала ючюн жууаплы болгъанла да белгиленнгендиле.