Тахта кёгетле багъаракъ, компьютерле уа учузуракъ болгъандыла

Быйыл январьда Къабарты-Малкъарда багъала 1,6 процентге ёсгендиле. Тахта кёгетле кёбюрек туруп башлагъандыла, компьютерле бла оборудование уа учузуракъ болгъандыла, деп билдиргендиле Россейни Банкыны республикада бёлюмюнден.

Тахта кёгетле дегенде, бегирек да нашала бла помидорла багъа болгъандыла. Сууукъла ючюн теплица мюлкле жылытыугъа бла жарытыугъа асламыракъ къоранч этгендиле. Дагъыда газны бла электрокючню багъалары да ёсгендиле. Оливка жау а энди учузуракъ турады. Аны тышындан ташыу бла кюрешген компанияла, сомну сыйы ёсгени себепли багъаланы тюшюргендиле.

Аш-азыкъладан башха товарла да учузуракъ болгъандыла. Жангы жыл байрамладан сора тюклю тонлагъа сурам тюшгени ючюн ала азыракъ туруп башлагъандыла. Энтта да бир сылтау – сомну сыйы ёсгенди. Ол шарт тыш къыралладан ташылгъан продукцияны багъасын мардасында тутханды. Башха жаны бла уа сурам да азайгъанды, кредитле бериу шошайгъаны бла бирге. Дагъыда тюкенле берген амалланы хайырындан компьютерле учузуракъ болгъандыла.

Сурам бла бирге киногъа билетлени багъасы да ёсгенди. Кинотеатрла арендагъа, иш хакълагъа эм башха жумушлагъа къоранчларын багъалагъа кёчюрюрге кюрешгендиле.

Республикада жыллыкъ инфляция алты процентге жетгенди. Ол къыралда орта кёрюмдю бла тенгди. Январьда НДС бла тарифле ёсериклерине кёре багъала кётюрюллюгю да белгили эди. Алай андан арысында уа ол шартла кючлерин тас этип, инфляция жангыдан шошайырыкъды. Россейни Банкыны тергеулерине кёре, быйыл ол 4,5-5,5 процент боллукъду, келир жылда уа тёрт процентде тохтарыкъды.