Устазны къыйын жолу

1982 жыл, Лейлягъа 22 жыл толгъанды. Ол Къабарты-Малкъар къырал университетни жетишимли бошап, дипломун къолуна алгъанды. Кёп бармай, 1 сентябрьден башлап, устазлыкъ ишин башларыкъды. Сабий заманындан сюе эди Лейля устаз болуп, сабийлени окъутургъа… Алай, ол иш къыйын да, жууаплы да болгъанын барыбыз да билебиз. Ол усталыкъны сайлагъан адам къыралны, жамауатны  аллында да кесине уллу борч алады, бютюнда ана тилден окъутурукъ устаз. Ол сабийлени къуру жазаргъа бла окъургъа юйретип къоймай, ана тилин сюерге, халкъыны ахшы адамларын, тарыхын, маданиятын билдиреди, сюйдюреди.

Сентябрь айы жетди. Лейля биринчи кере ана тилден дерс берликди: бешинчи классда, узакъ тау эллерибизни биринде. Дерсге тынгылы хазырланнганлыкъгъа, аны жюреги терк-терк урады, тынгысызды. Аны алайлыгъын кёрюп, школну завучу кесини кабинетине чакъырып, кёп ариу сёзле айтды, кёллендирди. «Къоркъма, хар бирибиз да алай башлагъанбыз, дерсге сен тынгылы хазырланнганса, классха киргенден сора, сабийле бла жарыкъ саламлашып, ойнай-кюле, дерсинги алай бардыр. Сабийле жомакъланы бек сюедиле… Ахшы жолгъа!» - деп кёллендирди.

Ма алай башланды Лейляны урунуу жолу. Быйыл ол школда ишлегенли къыркъ жылдан атлагъанды. Ол окъутхан сабийле олимпиадалада, тюрлю-тюрлю конкурслада, назму эришиуледе алчы жерлеге тийишли болгъандыла. Лейля кеси да, кёп кере ачыкъ дерсле берип, энди устазлыкъ ишлерин башларыкъ жаш адамланы кёллендиреди. Аны кёп грамоталары, ата-аналарындан ыспас къагъытлары, саугъалары да бардыла, департаментден да.

Бюгюн да анга къайсы дерсинг эсингде къалгъанды деп сорсанг, ол биринчи дерсим дейди, устазлыкъ ишни сайлагъан жаш адамлагъа уа быллай насийхатла этеди: эм алгъа, устазны жолу бек къыйынды, анда чыдамлы, тёзюмлю болургъа керекди. Экинчиден, сабийлени сюерге, ана тилни иги билирге, усталыкъны дайым ёсдюрюп турургъа, ючюнчюден а, бир тюрлю чырмаула чыкъгъанлай, аладан къоркъмай, алгъа атларгъа тийишлиди.        

  Бусагъатда ана тилден окъутхан устазлагъа къыйыныракъ болгъанды, нек дегенде, сабийлени кёбюсю (къуру ала угъай, атала, анала да) кеслерини ёз тиллерин билмейдиле, ана тиллеринде сёлеширге артыкъ сюймедиле. Миллетибизде чыкъгъан жангыз газетни бла журналны алмайдыла. Сабийлеге деп чыкъгъан «Нюр» журнал къаллай сейирликди. Анда тюрлю-тюрлю жомакъла, ариу суратла, окъуучуланы хапарлары, назмулары басмаланадыла, сабийлени сейирлерин ёсдюрюрча. Газетде бла журналда сюйюп окъурча кёп материалла басмаланадыла, къаллай бир зат билирге боллукъду: миллетибизни атын айтдыргъан жашланы  бла къызланы юслеринден очеркле, спортну усталары, жашау халла, газет окъуучуланы оюмлары.