Таза суу бла сылтаусуз этерча

КъМР-ни Къурулуш эмда  жашау журт-коммунал мюлк министерствосундан билдиргенлерича, былтыр ишлеп башлагъан   "Коммунал инфраструктураны жангыртыу"  федерал проектге кёре, жылны ахырына дери  таза суу бла жалчытырча иги кесек жумуш тамамланнганды. Ол санда 15 элде 83,7 километр чакълы бирде быргъыла тартылгъандыла эм тийишли объектлени къурулушу да баргъанды.    

Быйылны юсюнден айтханда, Нальчик, Бахсан эм Прохладный шахарлада бла къатларында элледе таза суу бла жалчытырча эм кир суу чырмаусуз саркъырча мадар этилликди. Аны бла бирге Хабазда, Бедикде, Экинчи Чегемде, Прималкинское, Инаркой, Акбаш эм Морзох элледе да  инфраструктура  объектлерине тынгылы ремонт этилип бошалыргъа керекди. 

Андан сора да, Куба, Каменномостское, Прохладный, Нальчикде, Экинчи Чегемде, саулай алып айтханда,  35,2 километр чакълы бирде таза суу барырча быргъыла тартыллыкъдыла эм аны бла байламлы башха жумушла да толтуруллукъдула.