«Аскер борчха кертиликлерин кёргюзтюп къуллукъ этген жерлешлерибиз бла ёхтемленебиз»

27 февральда Россейде Энчи операцияланы бардыргъан кючлени кюню белгиленеди. Сёзсюз, ССО-ну къуралыуу Россейни Сауутланнган кючлерини айныуларында къадар магъаналы эмда стратегиялы атлам болгъанды. Жерлеринден терк теберге онглары болгъан, шёндюгюлю сауутла эм техника бла жалчытылыннган бёлюмлени къуралыулары тыш политика майданда жангы чакъырылыула, къыралыбызны жалынчакъсызлыгъын эм къоркъуусузлугъун кючлеу бла байламлы болгъанды.

Къысха заманны ичинде ССО бёлюмле РФ-ни Сауутланнган Кючлерини къурамларында кеслерини тийишли жерлерин алгъандыла, Россей армияны аскер къолайлыгъын кючлеуге магъаналы къошумчулукъ этгендиле. Бёлюмле, къайсы болумда да терк эм тюз ишлеп, бек къоркъуулу эм энчи борчланы толтурургъа къолларындан келгенлерин кёргюзтгендиле.

Энчи опрерацияланы бардыргъан кючлени къауумлары бюгюнлюкде передовойдадыла – тасхачылыкъны толтурадыла, жауну тылында кюрешедиле, чеклени тийрелеринде жауланы диверсиялы къауумларын къурутадыла.

- Энчи составха кишиликлери эмда бийик усталыкълары ючюн битеу жюрегимден ыразылыкъны билдиреме. Сёзсюз, биз бусагъатда ССО-ну сатырларында Ата журтларын къоруулап, антларына бла аскер борчха кертиликлерин кёргюзтюп къуллукъ этген жерлешлерибиз бла да ёхтемленебиз.

Энчи операцияланы бардыргъан кючлени бёлюмлерини аскерчилерин бла ветеранларын профессионал байрамлары бла алгъышлайма! Саулукъ-эсенлик, жетишимле эмда Хорлам тежейме! – деп жазгъанды КъМР-ни Башчысы Казбек Коков МАХ платформада энчи каналында.