Кадастр эсепге салыуда тюрлениуле

Быйыл биринчи февральдан башлап жеринден тепдирилмеген мюлкню кадастр эсепге салгъанда изленирик къагъытланы жарашдырыугъа Росреестр жангы излемле кийиргенди. Алай бла энди тийрени карт-планына, техникалы эмда межевой планларына объектни адресин къошмай боллукъ тюйюлдю. Кесин да тюз ФИАС-да (федерал информациялы адрес система) неда ГАР-дача (къырал адрес реестр) ма алай, дегендиле Къабарты-Малкъарда МФЦ-да.

Баш магъаналы энди FIASID болады. Ол а неди десегиз, сагъынылгъан системада хар адресге берилген цифралы белги.

Болсада документледе адресни аллай белгиси жокъ эсе, мюлкню кадастр эсепге салыугъа тыйгъыч боллукъ тюйюлдю. Ол санда «дача» неда «гараж» амнистияланы чеклеринде этилсе да. Сёз мында адрес берилмегенини неда объектге ол изленмегенини юсюнден барады. Алай болса документледе жеринден тепдирилмеген мюлк къалайда болгъаны жик-жиги бла жазылып къалады.

Жеринден тепдирилмеген мюлкню официальный адреси жокъ эсе, аны иеси неда ол адамны келечиси аны жер-жерли самоуправление органда алыргъа керекди.

Заявленияны ма была берирге эркиндиле:

- объектни иелери (инсанла, предприятияла бла организацияла, энчи предпринимательле);

- ол жерде иш бла кюреширге, анга оноу этерге эмда башха тюрлю эркинликлери болгъанла;

- терек бахчачылыкъ эмда дача биригиулени келечилери;

- заявканы берликни эркинлиги бла башха адамла (инсанла, предприятияла бла организацияла, энчи предпринимательле);

- объектни иеси бла келишим этип ишлеген кадастр инженер.

Заявленияны «Мени документлерим» (МФЦ) аралада да жарашдырыргъа жарайды.

Жеринден тепдирилмеген мюлкню адреси болгъанын ФИАС-да (fias.nalog.ru) билирге боллукъсуз. Адрес ма быллай объектлеге бериледи:

- мекямлагъа (тынгылы ишленмегенле ары кирмейдиле), ол санда къурулушлары энтта да бошалмагъанлагъа да;

- сооружениялагъа (тынгылы ишленмегенни эмда узунлугъу энинден иги да кёп болгъанны санамай), ол санда энтта да ишленип бошалмагъаннга;

- жер участокга (элни ичинде тюйюл эсе, ол ары кирмейди);

- тынгылы къурулуш объектни бир кесегине;

- машина салгъан жерге (ол объектни неда сооруженияны бир кесеги эсе уа -угъай).