Усталыкъ хунерлерин ким къалай биледи

Къабарты-Малкъар къырал университетни мурдорунда «Профессионалла-2026» атлы чемпионатны регион уруму бардырылгъанды. Быйыл окъуу юй бу эришиуню сегиз тюрлю ызы бла байламлы сынауларыны майданы болгъанды.
 Андан билдиргенлерича, КъМКъУ-ну медицина колледжини майданында бир жолгъа юч ыздан эришиуле озгъандыла. Алагъа уа киндик аначылыкъ эмда багъыу иш жаны бла окъуй тургъанла къатышхандыла. Андан сора да, бу жол биринчи кере чемпионатха энчиленнген саулукъ-сакълау технологияла жаны бла юйрене  тургъан окъуучула  къошулгъандыла. Ол кеси да инсульт болгъан саусузланы игилендириуге бурулгъан ызды.

Республикалы клиника больницаны врачлары уа, эришиуню жюрисини келечилери болгъанларындан тышында да, окъуучулагъа  чемпионатха  къатышыр ючюн хунерлерин айнытыргъа болушлукъ да этгендиле. Чемпионат къымылдауну бардырыу жаны бла къуллукъчу Лиана Умарова бизге билдиргеннге кёре, жангы «Энчиленнген саулукъ сакълау технологияла» атлы майданнга гитче велотренажёрла, лимфодренаж массажёрла эмда ала бла ЭКГ-ны да этерге жарарыкъ тонометрле сатылып алыннгандыла.

- Жангы  аппаратны хайыры бла адамла кеслери юйлеринде, жаланда къан басымларыны ёлчемин билип  къоймай, жюреклерини къалай ишлегенин да кёраллыкъдыла. Быллай тонометрлени смартфонлагъа къошаргъа къыйын тюйюлдю, аны себепли уа, юйден чыкъмай окъуна, терапевтге керекли медицина кёрюмдюлени иерге боллукъду,-деп ангылатханды Умарова.

Экспертле  уа башха-башха ызлада ахшы хунерлери барлыкъларын ачыкълагъан жаш адамланы, ала  окъууларын бошагъанлай, ишге тохташдырыргъа шёндю окъуна сайлагъанларын билдиргендиле. Ол а мында эндиге дери да бола келген шартды. КъМКъУ-ну медицина колледжини окъуучуларына  урунуу рынокда сурам дайым болгъанлай тургъанын а жашау кеси ачыкълайды.

«Багъыу ишни» ючюнчю курсунда окъуй тургъан Алакъайланы Алийхан кесине беш бёлюмню сыйындыргъан эм  къыйын ызладан биринде къатышханды эришиуге. Мардасы белгиленнген заманны ичинде анга саусузну тинтип къараргъа, болгъан жараларын ачыкъларгъа эмда анга биринчи медицина болушлукъну этерге керек эди. Жюри белгилегеннге кёре, фельдшер усталыкъны сайлагъан жаш бу жумушну тынгылы тамамлагъанды.

- Берилген ишге тийишлиликде, биринчи кере бизге сюеги сынып, ачыкъ жарасы да болгъан саусузгъа къараргъа керек эди. Ызы бла – талагъы атылгъаннга бла эки къолу да бууунларына  дери кюйгеннге. Бу жумушланы барысын да врач къалай бардырыргъа тийишлисин биз манекенни болушлугъу бла гигиенадан башлап, жараны къалай байларгъа дери да кереклисин тохташдырылгъан низамгъа кёре кёргюзтгенбиз. Хар затны да жангылмай, унутмай, саусузгъа не къадар ахшы болушлукъну этерге тийишлиди. Эришиуде берилген ишни тамамлаялгъанбыз деп сунама. Мында алгъан сынамыбыз да артда бизге себеплик боллукъду, - дегенди Алийхан кеси уа.

Дарина  Касимова да ючюнчю курсда билим ала турады. Ол а эришиуге «Энчиленнген саулукъ сакълау технологияла» ызында къатышханды. Анга уа инсульт къыйнагъан  саусузну  аз-аздан саулугъун къалай бла  игилендире барыргъа боллугъун ангылатыргъа тюшгенди. Ол эм алгъа апчыгъанын да жашырмайды, алай эсе да, берилген жумушну уа тынгылы эталгъанды.

- Манга саулугъу бла байламлы тарыгъыулары бла келгеннге къарап, аны реабилитациялауну жолун тохташдырыргъа керек эди да, аллай планны жарашдыргъанма. Экспертле хар нени да тюз этгеними белгилегендиле, анга къууаннганма. Эришиуге  къатышханыма да алай, нек дегенде усталыкъ хунерни эбине тюшюнюуде аны магъанасы энчиди,-дегенди Дарина.

Эришиуню эсеплери энди чыгъарыкъдыла. Мында хорлагъанлагъа уа чемпионатны кезиулю регионла аралы урумуна къатышыргъа амал берилликди. Ол а 30 мартда  башланып,  30 апрельге дери бардырыллыкъды. Эм ахшы даражада хунерлерин ачыкълагъанланы уа, белгиленнгенича, иш бериучюле урунуу жолларын кеслеринде башларгъа чакъырлыкъдыла.