Эркинликлеригизни билигиз!

Бюгюнлюкде энчи аскер операция бла эмда къыралыбызны бир-бир жерлеринде уллу къар жаугъаны ючюн самолётланы заманларында учууу бек азайгъанды. 20 февральда Нальчикден Москвагъа учхан эки рейс да 5-7 сагъатдан артыкъ заманнга кеч учхандыла. Кёп адамла сау кюнлерин аэропортда ётдюргендиле, алай, насыпха, аланы аш-суудан апчымазча жалчытхандыла.

Адамны самолёт кеч къалгъанында къаллай эркинликлери болгъаныны юсюнден кёп авиакомпанияла кеслерини сайтларында билдиредиле, андан сора да, къыралны кёп официал сайтларында информация табаргъа боллукъду. Бюгюн биз сизге билдиргенни да «Аэрофлот» компанияны бла Роспотребнадзор кеслеринде жазгъаннга къарап хазырлагъанбыз.

Бек биринчиден, самолётланы заманында учмагъаныны кёп тюрлю сылтаулары бардыла. Аланы эки бёлюмге юлеширге боллукъду:

1. Перевозчикни хатасындан болгъан кеч къалыула:

- самолётну кеч келгени;

- самолётда ишлеген экипажны алышдырыуу;

- овербукинг – билетле самолётха болгъан жерледен эсе кёп сатылсала.

2. Перевозчикни хатасындан болмагъан кеч къалыула:

- кюн бузулгъаны, къаты жауунла, къарла эм башха аллай затла;

- самолётну техника жаны бла къыйынлыкълары (техническая неисправность);

- аэропортда ишлегенлени забастовкалары;

- аскер бла себепли жумушла (военные действия);

- беспилотный атакала.

Самолётну нек кеч къалгъанын билирге керекди: кеч къалгъаныгъыз авиакомпанияны хатасындан болмаса, ол анга къоранчлары болмайды (не несет ответственность и убытки).

Авиаперевозчиклени борчун билирге сюе эсегиз, бу законланы бла документлени окъургъа боллукъсуз:

- Воздушный кодекс;

- Гражданский кодекс;

- Федеральные авиационные правила «Общие правила воздушных перевозок пассажиров, багажа, грузов и требования к обслуживанию пассажиров, грузоотправителей, грузополучателей».

Авиакомпания самолётну кеч къалгъаны ючюн пассажирлеге къаллай болушлукъла этерге борчлудула:

1. Самолёт не бек гитче заманнга кеч къалгъанлыкъгъа да, гитче сабийлери болгъанлагъа (7 жылгъа дери) ана бла сабийге этилген отоуну берирге керекдиле;

2. 2 сагъат бла андан кёп ётсе, сизни  служебный телефон бла эки кере сёлеширге неда электронный почтагъа жазаргъа амалыгъыз барды. Андан сора да, авиакомпания хар учханнга суусап берирге керекди;

3. 4 сагъатдан кёпге кеч болса, хар учхан адамгъа исси аш берирге керекдиле. Андан сора да, суу берирге да керекдиле.

4. 8 сагъатдан кёп (кече 6 сагъат) ётсе, битеу учханлагъа гостиницада номер берирге керекдиле. Гостиницагъа дери эм артха автобус неда башха машина да берилирге керекди.

Самолётугъуз кеч болгъанда не зат этерге керексиз:

1. Авиакомпанияда ишлеген адамны табаргъа керексиз. Ол аэропортну ичинде билетле болгъан жерде болуучуду. Сиз билетлеригизни алып, учакъгъа чыкъгъан жерге ётген эсегиз, аллай ишчи самолётха чыгъар жерде болургъа керекди.

2. Ол ишчиден самолёт кеч келликни юсюнден жазыу алыргъа боллукъсуз, андан сора самолёт ненчагъа кеч болгъанына кёре, аш-суугъа неда гостиницагъа талон алыргъа боллукъсуз.

Рейсни кеч къалгъаны кёбюсюнде пассажирлени ахчаларын жойдурады. Ол заманда материальный компенсация дегенни тилерге боллукъсуз. Алай аны сизге берирге боллукъдула, самолёт кеч авиакомпанияны хатасындан болса. Хар сагъат ючюн тёлеу иш хакъны эм аз ёлчемини 25 проценти тенгли боллукъду, алай билетни багъасыны жартысындан кёб а бериллик тюйюлдю. Алай, официал сайтла билдиргеннге кёре, мартдан бу жаны бла тюрлениуле болургъа боллукъдула. Аны ючюн жангылыкъла чыкъсала, окъургъа эринмегиз.

Самолётланы кеч къалгъанларындан сора да башха шахарда неда шахарны башха аэропортунда къонаргъа боллукъсуз. Аллай болумла артыкъ кёп кере тюбемейдиле, алай кесигизни къалай жюрютюрге кереклисин билирге керексиз. Быллай болумгъа тюшсегиз, аэропортну ишчилеринден сизни шахарыгъызгъа элтир самолёт не заман келлигин билирге керекди. Сора, неда кесигиз машинада, таксиде кетерге боллукъсуз, неда авиакомпания берген автобус бла къайтыргъа. Былайда кёпле жарсып, гузабагъа тюшюп къаладыла. Аэропортну къатында ишлеген таксистлеге тюшсегиз, аланы къууандырлыкъсыз, алай иги кесек ачхагъызны къоратырыкъсыз.

Алайды да, кесигизге сакъ болугъуз эмда кеси эркинликлеригизни уста билигиз. Аланы билсегиз, кесигизни жашауугъузну тынчайтыргъа боллукъсуз.