Бизнесге къырал этген себепликни хайыры уллуду

Шимал Кавказ федерал округда гитче эмда орта бизнес бла кюрешгенле МСП Корпорацияны Миллет гарантияла системасыны хайырындан былтыр 42,6 миллиард сом къоллу болгъандыла. Буруннгу жыл бла тенглешдиргенде ол жети процентге кёбюрекди, дегендиле Къабарты-Малкъарны Экономиканы айнытыу министерствосунда.

«Къырал болушлукъ бериуде Шимал Кавказ магъаналы жерледен бириди. Регионда гитче эмда орта бизнесге уллу эс бурулады, нек дегенде ала ишчи жерле бла жалчытадыла, экономиканы къадар бёлюмлерине себеплик этедиле. Къыралны болушлугъу уа предпринимательлеге кёбюрек ахча мажарыргъа онг береди. Сёз ючюн, производстволаны айнытыу жаны бла инвестициялы проектлеге, продукцияны чыгъарыуну кёбейтирге дегенча», - деп чертгенди РФ-ни Правительствосуну Председателини орунбасары Александр Новак.

Сагъынылгъан Гарантияла системаны чеклеринде СКФО-да гитче эмда орта бизнес былтыр 4,8 кереге кёп ахчаны илму-техника жумушлагъа алгъанды. Дагъыда билим бериуге - 2,8, культура бла спортха уа – 2,1 кереге кёп. Инфраструктура къурулуш да иги (1,8 кереге аслам) къошханды, бизнес жумушла бла жалчытыуну (+60%) да хатасы жокъду. Статистика тизмени ахырында жюкле ташыу бла адамлагъа жумушла бериу турадыла - алада ёсюм 27 эм 26 процент болгъанды.

Къырал берген онгланы башхаладан эсе тири Ставрополь крайда (16,8 миллиард сом багъасына), ызы бла Дагъыстанда (6,89 миллиард), Чечен Республикада (5,33), Къабарты-Малкъар Республикада (4,41) эм Ингушетияда (3,61) хайырланнгандыла.

Министерствода белгилегенлерича, Шимал Кавказ федерал округда гитче эмда орта бизнесге себеплик этиу эм аланы айнытыу жумушла «Къыйматлы эмда конкуренциягъа чыдамлы экономика» миллет проектни чеклеринде тамамланадыла.