Тарыгъыулагъа, тилеклеге да эс бурулады

Къабарты-Малкъарны Регионнга оноу этиуню арасы (ЦУР) республиканы инсанларыны бла власть органланы араларында байламлыкъланы жалчытыу эмда жамауатны тилеклерине бла тарыгъыуларына къысха заманда къаралып, тийишли мадарла этилиу жаны бла ишни тири бардырады. Тилеклени бла тарыгъыуланы кёбюсю уа «Telegram», «Одноклассники», «ВКонтакте» социал сетьлеге салыннган «Инцидент Менеджмент» системаны амалы бла айырылгъанладыла.

Анга кёре бир айны ичинде окъуна Арагъа социал сетьлени себепликлери бла юч мингден аслам тилекге бла тарыгъыугъа къараргъа тюшеди. Аланы кёбюсю, хар замандача, социал къоруулау, жашау журт-коммунал мюлк, тийрени игилендириу, жолланы тапландырыу, саулукъ сакълау бла байламлыдыла. Специалистле, аланы хар бирине тынгылы къарап, магъаналарына кёре тийишли ведомстволагъа жибередиле.

Алайды да, кёп болмай Терек шахарда жашагъанланы тилеклери бла  Лермонтов атлы орамда орналгъан 82-чи номерли кёп фатарлы юйге тийишли халда жылыу берилирча этилгенди. Ишлени кезиуюнде 60 метр чакълы бирде тозурагъан быргъыла алышындырылгъандыла. Алай бла мында жашагъан 60 адам къыш сууукълада жунчумазча болгъандыла.

Нальчикде да Мальбахов бла Тырныаууз орамла бирге къошулгъан жерде быргъы атылып, таза суу тёгюле тургъанын жарсып билдиргендиле ол тийреде жашагъанла. Ол болумну юсюнден тийишли жерлеге билдирилгенди. Ызы бла специалистле алайгъа мычымай жетип, къысха заманда аны жараулу халгъа келтиргендиле.  Алай бла ол тийреде кёл къуралмазча эмда жер бузламазча этгендиле.

Прохладный шахарда да Дарьял орамда 2-чи номерли юйню къатында эркинликсиз къуралгъан багуш тёбе къурутулгъанды. Саулай алып айтханда, зыбыр къалгъан-къулгъанладан 18 кубометр кетерилгенди эм ахырында тийре санитар мардалагъа келиширча халгъа келтирилгенди.

Андан сора да, Басханда Будённый атлы орамда кёп фатарлы юйге жылыу барырча этилгенди. Алай этер ючюн, тозурагъан быргъыны алты жерин жамаргъа тюшгенди эм башха ишле да тамамланнгандыла. 

Инсанланы жарсыуларына терк эс бурулурча этиу ЦУР-ну баш борчларындан бири болгъанлай къалады. Аны себепли жамауатны тилеклери эмда тарыгъыулары бла ишлеу тохтаусуз барады. 
Эсгертиу: Регионнга оноу этиуню арасы офис халда ишлемейди, «Инцидент менеджмент» бир тюрлю соруугъа эс бурур ючюн, ол социал сетьлени биринде жазылыргъа керекди. Ол санда кемчилик тынгылылыракъ ачыкъланса игиди.