Хар элни къой союуууну башхалыгъын унутмазгъа тийишлиди

Бюгюнлюкде тыш къыраллагъа солургъа барырдан алгъа анда кесин къалай жюрютюрге кереклисини юсюнден билирге тийишлиди. Таулула: «Хар элни да къой союуу башхады» - деп,  аллай бир зат ючюн айтхан болурла. Алайды да, узакъ жолоучулукъгъа атланнгынчы, анда тышындан келген къонакъгъа  не зат эркин этилгенин бла къалгъанын сурап билген игиди. Низамлыкъны жорукълары къайда да башхадыла эм бир бирлерине ушамайдыла. Алагъа бузукълукъ этилгени ючюн салыннган тазирле да бирча тюйюлдюле. Бир-бирлерини юслеринден сизге да билдирирге сюебиз.   

Ислам дин жюрюген къыраллада халкъ аслам жыйылыучу жерледе кеф этиучю ичгилени ичерге бир да умут этмегиз. Сёз ючюн, Бирикген Араб Эмиратлада правогъа ол халда бузукълукъ этгеннге 600 доллар тазир салыныргъа, 70 кере къамичи урургъа эм эки айны  тюрьмеде турургъа деп, сюд этилирге боллукъду.

Францияны юг кесегинде орналгъан Мотте деген курорт шахаргъа тебиреген эсегиз, биргегизге  дезодорантдан аслам алыргъа кюрешигиз. Муниципал законнга кёре, анда терлеген ийис этген туристге тазир салынады. Полициячыла энчи тинтиу бардырыр ючюн, адамланы тохтатыргъа, аладан тазир алыргъа неда кюч бла жууундурургъа эм быстырларын алышындыртыргъа эркиндиле.

Тютюн ичиучюлеге деп да энчи законла бардыла. Сёз ючюн, сиз Сингапурда халкъ аслам жыйылгъан жерледе, артыгъыракъда тютюн ичмеучюлеге деп ишленнген къонакъ отоулада, тютюн букъулатыргъа базынсагъыз, 500 сингапурлу доллардан къуру къалыргъа боллукъсуз. Ирландияда аллай бузукьлукъ  ючюн 300 евро тёлерге тюшерикди. Индияда уа тазир артыкъ уллу тюйюлдю - жаланда 200 рупий, башхача айтханда, 120 сом чакълы бир.

Эсигизде болсун, Таиландда Аны Бийиклиги Рама Пампион Адульядет IХ суратына  сансызлыкъ бла къарасагъыз окъуна къырал даражада этилген аманлыкъ ишге саналады. Сиз аны суратына бармагъыгъыз бла кёргюзтюп кюлсегиз а,  тазир салыныргъа неда къыралдан къысталыргъа къоркъуу барды. Ол жерли сабийлени башларын сыларгъа базына эсегиз а, къаугъа къозгъаргъа эм полиция участкагъа тапдырылыргъа боллукъсуз.

Тюркде тенгиз жагъада бош ташчыкъны саугъаныча юйюгюзге элтирге умут эте эсегиз, иги сагъыш этигиз. Нек дегенде ол кьыралда тенгиз жагъадагьы ташчыкъла археология хазнагъа саналадыла. Аланы къыралдан тышына чыгъарыргъа кюрешиу  законнга бузукълукъ этгеннге саналады эм аллай туристге 10 жылгъа дери тюрьмеде турургъа деп, сюд этилирге боллукьду.

Алайды да, къыйын болумгъа тюшмез ючюн, ол неда бу къыралгъа` атланырдан алгъа, аны законларын эм жер-жерли тёрелерин билирге кюрешигиз. Агентство сизге аланы юслеринден билдирмей эсе неда баргъан къыралыгъызны законуна билмей бузукълукъ салдыгъыз эсе, фирма лицензиясындан къуру къалыргъа боллукъду. Сиз да къоранчларыгъызны  къайтырырын  излерге эркинсиз.

Арт жыллада Россейни бир-бир регионлары да туризм бла байламлы энчи жорукъла кийиредиле. Болсада ала бюгюнлюкде тилек халдадыла. Барыбыз да билгенден, Шимал Кавказгъа келгенледен тобукъдан къысха болмагъан тёбен жанла киерлерин тилейдиле. Къысха кёнчеклени бла майка халда огъары жанланы киймезлерин а эр кишиледен окъуна излейдиле. Аллай жазылмагъан, закон бла да тохташдырылмагъан жорукълагъа ыразы болмагъанла аз тюйюлдюле. Аны юсюнден  социал сетьледе да даулашла тохтамайдыла. Къаугъала чыгъа тургъанларыны юсюнден да терк-терк окъургъа тюшеди. Ол жаны бла хал бютюнда Дагъыстанда къатыды. Аны анда жашагъанланы асламы да жаратмайдыла. Баям, аллай излемлени тыш къыралладача закон бла тохташдырыргъа тийишли болур. Ансыз, хар ким да кесини энчи кёз къарамы бла байламлы жорукъланы тохташдырыргъа кюреширикди.