Кеслери иш къурап къармашханлагъа онг бериледи

Предприятияла бла организацияла 223-ФЗ законну излемлерин толтура, къырал берген ахчагъа кеслери иш къурап къармашханладан былтыр саулай Россейде 48,3 миллиард сом багъасына абериле сатып алгъандыла. Буруннгу жыл бла тенглешдиргенде, ол тёрт кереге кёп окъуна болгъанды. Этилген келишимлени саны уа ючден бирине кёбейип, онеки мингден атлагъанды.

Быллай инсанладан асламысында (23 миллиард сом багъасына) финанс эмда страховой жумушла сатып алыннгандыла. Кёп къалмай юч миллиардха энчи къурулуш ишлени багъасы тёленнгенди, 1,7 миллиардха уа транспорт жумушла жалчытылыннгандыла. Кеслери иш къурап къармашханла дагъыда 1,6 миллиард сом багъасына усталыкъ, илму эмда техника жумушла жалчытхандыла.

«Быллай инсанла къырал сатыу-алыу системада эм магъаналы жерни алып башлагъандыла. Сагъынылгъан законну хайырланнганланы саны кёп къалмай 28 минг болгъанды. Къырал алагъа себеплик этеди, ол санда ары дери жаланда гитче эмда орта предпринимательство хайырланыучу онгладан да береди», - дегенди МСП Корпорацияны башчысы Александр Исаевич.

Къабарты-Малкъарда уа кеслери иш къурап къармашханладан былтырдан эсе 14 процентге кёбюрек товарла эмда жумушла сатып алыннганды – битеу да 30 миллиондан аслам сом багъасына, деп билдиргендиле республиканы Экономиканы айнытыу министерствосундан. Предприятияла бла организацияла къырал берген ахчагъа ишлей эселе, аны тёртден бирине гитче эмда орта предпринимательство, сора ма аллай инсанла бла келишимле этерге борчлудула, деп чертгендиле министерствода.