«Цифралы болумну» - хайырланыучулагъа таплыкъгъа

ВТБ банкны «Цифралы болум» деген башламчылыкъ халда къуралгъан проектин Къабарты-Малкъарда хайырланыуну юсюнден кенгеш бардырылгъанды. Республиканы Правительствосуну юйюнде жыйылыугъа бу финанс учрежденияны эмда регионну цифралы технологияланы айнытыугъа сейирлери болгъан ведомстволарыны келечилери къатышхан эдиле, деп билдиргендиле КъМР-ни Экономиканы айнытыу министерствосундан.

Кенгешде экономиканы айнытыу министри  Рахайланы Борис, бу министерствода регионну маркетинги эмда тыш байламлыкъла департаментни башчысы Севиль Богацкая, жарыкъландырыу эмда илму министрни орунбасары Мухамед Харзинов, цифралы айныу, связь эм асламлы коммуникацияла, транспорт эмда жол мюлк министерстволаны келечилери да болгъандыла.

Ушакъны кезиуюнде республикада жашагъанлагъа берилген банк жумушланы игилендирик борчланы сюзгендиле, регионда цифралы сервислени айнытыуну юсюнден да сёлешгендиле. Власть органла бла банк ишни бирге бардыргъанлары себепли инновацияла жетишимли кийирилликдиле, хайырланыучулагъа да тап болумла къураллыкъдыла, деп белгилегендиле Экономиканы айнытыу министерствода.