Законлукъну сакълаугъа сакъ боллукъдула

 Къабарты-Малкъарны Жамауат палатасыны комиссиялары биринчи жыйылыуларында быйыл тамамларыкъ жумушларыны планын бегитедиле. Бу кюнледе биринчи жыйылыуларын Жамауат къоркъуусузлукъ, законлукъну сакълау эмда ОНК бла байламлыкъла жюрютюу эмда Патриот юйретиу, добровольчество, жаш тёлю политика эмда ветеранлагъа болушуу жаны бла комиссиялары ётдюргендиле.

Жамауат къоркъуусузлукъ, законлукъну сакълау эмда ОНК бла байламлыкъла жюрютюу жаны бла комиссия энчи эс тюрмеледен чыкъгъан адамла бла эркинликлери условный халда сыйырылгъанла жангыдан законну бузмазча, аланы жамауат жашаугъа тюзетиуде мадарла этерча  ведомстволаны араларында байламлыкъланы къурау бла кюреширикди. Жаш адамла аманлыкъчылыкъны жолуна турмазларына, саулукъларында энчиликлери болгъан адамлагъа болушууну амалларына къараллыкъды. Андан сора да, «Къоркъуусузлукъ республика» аппарат-программа комплексни хайырлылыгъы, Нальчикде адамланы аслам къатышыулары бла байрамланы неда жыйылыуланы бардырыуну эсеплери чыгъарыллыкъдыла.

Комиссия «тёгерек столла», жамауат тинтиуле, муниципал къуралыулада жыйылыула бардырлыкъды, ишинде МВД-ны бёлюмю, Жаш тёлюню ишлери жаны бла министерство, Прокуратура, УФСИН бла байламлыкъла жюрютюрюкдю.

Патриот юйретиу, добровольчество, жаш тёлю политика эмда ветеранлагъа болушуу жаны бла комиссия уа энчи эс жаш тёлю арада Ата журтха кертиликни бла сюймекликни магъанасын ангылатыугъа, аланы аскер-патриот халда юйретиуге, адамлыкъны бла огъурлулукъну таза ниетлерин сингдириуге, тёлюлени араларында байламлыкъланы тохташдырыугъа, насийхатчылыкъгъа, СВО-гъа къатышханла бла ишлеуге бёллюкдю. Комиссияны башчысы Владимир Абаноков белгилегеннге кёре, палатаны Уллу Хорламны 80-жыллыгъына аталгъан «Лица Победы Кабардино-Балкарии» проектини чегинде эмда республикабыздан урушха къатышхан аскерчилерибизге жоралап, регион порталда 2500 тарых материал басмалагъанды, бу иш быйыл да бардырыллыкъды.