Адамладан ыспас таба

Элбрус районда МФЦ-ны ишчилери кюн сайын жюзден артыкъ адамны кёп тюрлю жумушларына къарайдыла. Алагъа бет жарыкълы тюбеп, жарсыуларына болушлукъ, себеплик этиуню баш борчларына санайдыла.

Кёп болмай къагъыт жумушларым бла бир ненча кере баргъанма ары. Анда ишлегенле бири къалмай билимлиле эм жууаплыладыла. Ишиме къарагъан къызны бэйджигинде Акъкъайланы Лида деп жазылып тура эди. Аны ишин билгени, аны бийик даражада толтургъаны бек къууандыргъанды. Лида бла къаршыракъ танышыр муратда дагъыда бир кере тюбешгенме.

Жигитими атасы бла анасы Акъкъайланы Магомед бла Хаджиланы Фатима Тырныауузда жашап, юч сабий ёсдюргендиле. Ала барысы да энчи юйюрлерин къурап, жашау этедиле. Абадан жашлары Омар кесини ёз иши бла кюрешеди. Нефть, газ бла байламлы билим алгъаны себепли, ишлеген да усталыгъына кёре этеди, энчи предпринимательди. Ортанчылары Хаджимурат, белгили штангачы, ауур атлетика бла кюреше, 2004 эм 2008 жылладагъы Олимпиада оюнлада кюмюш эм доммакъ майдалланы алгъанды. 2011 жылда дунияны чемпионатында хорлап, «World Weightlifting» журналны сайлауу бла дунияны эм иги ауур атлетчисине саналгъанды. Хаджимурат физкультураны эм спортну айнытыугъа салгъан къыйыны, болдургъан бийик жетишимлери ючюн «За заслуги перед Отечеством» орденни биринчи эм экинчи даражалы майдаллары бла саугъаланнганды. Бусагъатда ол Ростовда жашайды. Ростов областьны Ауур атлетика федерациясыны президентиди. Дагъыда кесини энчи ишин къурап, аны бла да кюрешеди.

 Лида уа, Тырныауузну 1-чи номерли лицейин бошап, жашауун туризм бла байларгъа сюйгенди. Атасы бла бирге ара шахаргъа барып, заочно халда сюйген окъуууна киреди. Анда бир жыл окъуп, сайлагъан усталыгъын кёлю бла сюйгенин ангылагъанындан сора, очный халда окъуп бошайды. Окъуудан сора да, анда ишге кирип, усталыгъын айнытыр онгу болса да, анасына болушлукъ, жылыу керек болгъаны ючюн, бери къайтханды. Бир ауукъ замандан ол Нальчикде «Маяк» санаторийге ишге киреди. Анда ол усталыкъны дерсин алгъанды десек, керти боллукъду.

– Толгъурланы-Мамайланы Айшат Магомедовна кадрла бёлюмюне алгъан эди ишге. Сервис бла туризм жаны бла специалист да этеди. Къагъыт бла ишлеу къачан да тынч болмагъанды. Ол мени анга юйретгенди, анга бек ыразыма. Кеси да тюзлюгю, адамлыгъы бла манга юлгю болгъанлай къалгъанды, – дейди Лида.

 Ол ишден да кетерге тюшеди. Ишлерге юйреннген, кеси излемлерин жалчыта билирге сюе эди. Элбрус районда МФЦ-ны филиалы ачыллыгъын эшитип, ары орналыргъа кёлленеди. Алай бла, биринчи кюнюнден башлап, Лида мында урунады. Биринчи айны Нальчикге жюрюп, анда усталыкъларын айнытхандыла. Элбрус районну практикачыларыны бек фахмулула, хунерлиле болгъанларын ачыкълап, бир ай стажировкадан сора кеслери алларына ишлеяллыкъларын тестле бла тохташдыргъан эдиле. Андан бери специалистле жамауатны жумушларын толусунлай жалчытыугъа бек сакъдыла.

– Бизни таматабыз Толгъурланы Расул огъурлу адам болгъанды. Хар бирибизге да эс буруп, билмеген затыбызгъа тюбесек да, хыны этмей, бирге жууап излеп, коллективни кесине жууушдургъанды. Биз анга «Уллу папа» деп да айтыучу эдик кеси арабызда, чам халда. Аны айта келгеним, биргеме ишлегенле бла арабыз болмагъанча шуёх, иги, татлы болгъанды. Сен эт, мен эт дей турмай, бирибизге болушургъа башхабыз мычымай жете эдик. Мени оюмума кёре, ишни, усталыкъны да сюйдюрген ышанладыла была, – дейди, ишлеп кетген таматасына бла тенглерине ыразылыгъын билдире, Лида.

Аллына келген адамланы ыразы этип, къагъытларын жарашдырып, ашыралса, анга бек къууанады кеси да. Адамланы атлары башхача, къылыкълары да башха болады. Бирле хаталары болмай тургъанлай, келип къычырып да кетедиле, бирле уа ачыуларын да аладыла специалистледен. Алай, тёзюмлери бла къылыкълары иги болгъандан, психологиядан да дерсле алгъанлары ючюн болур, мында уруннганла адамлагъа ариу бетден, жарыкъ кёзден къарайдыла. Бу ишде Лида энчи насыбына, жашау нёгерине жолукъгъанды: Тюменланы Аскер бла юйюр къурап, насыплы балачыкъланы: Сафияны бла Азнаурну ёсдюредиле. Къайын анасы Ахматланы Светлананы биргесине жашагъанына да ыразыды Лида, нек дегенде ол андан кёп затха юйренеди.

– Ал заманда башха юйюрледен эки адам бирге къыйналып келише да болур эдик. Бусагъатда уа, кесим абаданыракъ бола баргъаным ючюн болур, анабызгъа бегирек байланама. Ангылагъан да иги этеме. Ол да сау болсун, терс жеримде да жумушатып, билмеген затымы да билдире, кесине алай жууушдургъанды, - деп, бети жарый, хапарлайды мени жигитим.

Адам кеси насыплы болса, тёгерегиндегилеге да насып тёгеди, деген керти болур. Лидагъа къарасанг а, жашарыгъынг, къууанырыгъынг келеди.

Бош заманында ол илму неда документли кинолагъа къараргъа сюеди. Башха тиллени окъургъа, сёлешиу халда билирге итинеди.

– Адам насыплыгъа санар ючюн кесин, ол, биринчиден, тёгерекде бола тургъан затланы барын да жюрегине алмазгъа керекди. Экинчиден, ёз айныуун тохтатмазгъа, хар жашауунда болгъан затлада жаланда игиликни излерге керек болур. Хар нени да башы уа – юйюрдю. Кеченг, кюнюнг да сюйген адамларынга къууана жашагъандан уллу насып болмаз, хау, мен насыплыма деяллыкъма, – деп, кеси оюмун алай билдиреди Лида.

Атасына бла анасына уа бюгюннгю кюню ючюн ыспас этеди. Жылыуларын, къайгъыларын бере, къоруулагъандыла неден да, билим берип, къатында болгъандыла. Бюгюнлюкде мени жигитим аламат бийчеди, юйю таза, хар зат кеси жеринде. Аш этерге артыкъ сюймесе да кеси, адамлары аны азыгъын махтап ашагъанларын кюлюп айтады.

Огъурлу бетинден нюрю тёгюлген таулу тиширыу бла ушакъ этиу, мени игиликге ийнандырады, жарыкълыкъны дуниясына къайтып бёлейди.