Къыралыбыз кесини жалынчакъсызлыгъын жалчытыр ючюн кюрешни тохтатырыкъ тюйюлдю

Россей Федерацияны Президенти Владимир Путинни озгъан жылны аягъында чыкъгъан указына кёре,  2026 жыл Россейни халкъларыны бирлигини жылыды. Баям, ол бошдан этилген болмаз, къоркъуусузлукъ жаны бла къыралгъа къайгъы келсе, бизде халкъ не заманда да биригип болгъанды. Шёндюгю кезиуде да болум алайды десек жангылмазбыз. Сауутланнган кючлерибиз Украинада энчи аскер операцияны бардырып башлагъанлы тёрт жылгъа жууукълаша келеди. Не зат тюрленнгенди ол кезиуню ичинде къыралда, бизни тёгерегибизде деп сорургъа боллукъбуз кеси-кесибизден. Бек алгъа айтырыгъым, Президентибиз аскерчилерибизге салгъан борчну ала тийишлисича толтура баргъанларына тюшюнебиз. Къыралда идеология болум, хал да иги жанына тюрленнгенди, халкъланы араларында бир тюрлю-бир чюйрелик, неда къайгъы жокъду деп, шатык айталлыкъбыз. 

Деменгили къыралыбыз кесини жалынчакъсызлыгъын сакълар эм къоруулар ючюн, фашизмни жайылыуун тохтатыр, Украинаны ичинде жашагъан орус халкъны бандеровчуладан къоруулар ючюн, артха турмазлыгъын ачыкъ кёргюзтеди. Ары «Орешник» ракеталаны жиберип башлагъанлы Россей бла байламлыкъланы жангыдан тохташдырыргъа эм Владиимир Путин бла да тюбеширге кереклисини юсюнден Германияны эм Францияны башчылары Фридрих Мерц бла Эммануэль Макрон, тюнене уа Финляндияны премьер-министри Петтери Орпо да билдиргендиле.

Тёрт жыл, былай алып къарагъанда, азды адамны ич дуниясын, жашаугъа къарамын тюрлендирирге да, дерге боллукъбуз. Алай, биз барыбыз да кёребиз шёндю къыралда болгъан биригиулюкню. Была бош сёзле тюйюлдюле, халкъ асламла бла тюбешген кезиуледе эшитгеними жазама, жамауат да башха болгъанды, адамларыбыз къырал башчыбыз бардыргъан политикагъа ыразылыкъларын букъдурмайдыла, ачыкъ айтадыла. Уллу эм гитче шахарлада да военкоматлагъа адамла кеслери алларына барып, ал сатырда болгъан аскерчилерибизге къошулургъа хазыр болгъанларын да кёребиз.

Эсигизде эсе, энчи аскер операция башланнгандан сора, жети айдан мобилизация бардырылыргъа буйрукъ чыкъгъан эди. Ол кезиуде бир къауумла военкоматха барыргъа къоркъгъандыла, тышына кетгенле да болгъандыла… Шёндю болум ахыр да тюрленнгенди. Аскерде къуллукъ этерге сюйгенлени саны ёседен - ёсе барады.  Келишим бла къуллукъ этерге сюйгенлени саны да ёседи.  Адамла Ата журтну къорууларгъа кереклисин кеслери иги ангылайдыла. СВО-гъа къатышханланы ичинде республикадан окъуна къаллай бир аскерчибиз даражалы къырал саугъалагъа тийишли болгъандыла. Шёндю ветеранларыбыз а  жер -жерледе  жаш тёлюню патриот жаны бла ёсдюрюу ишни бардырадыла, хорлам жаланда бирликде боллугъун ангылатадыла алагъа.

Халкъ энди кеси да тюшюннгенди келир тёлюбюз мамырлыкъда, ырахатлыкъда жашар ючюн, кюрешни, ол санда идеология жаны бла да, тохтатмагъанлай бардырыргъа кереклисин. Белгилерчады, энчи аскер операциягъа къатышхан жашларыбызда болгъан къарындашлыкъны, аланы бир бирге билеклик этиулерине сукъланырыгъынг окъуна келеди. Бир юлгю: алгъаракъда «Звезда» федерал каналда СВО-ну ветераны-сакъаты Тёбен Чегемде ёсген Атайланы Илиясны эм аны бла бирге къуллукъ этген жашланы кёргюзтген эдиле. Ол бериуде Илиясны атасы Мусабий,  генерал-лейтенант Апти Аллаудинов эм башхла да  сёлешген эдиле. Алай Мусабийни бла Илиясны айтханларын энчи белгилерчады. Атасы, жашы да эр киши, Ата журтха къуллукъ этерге чакъырылгъан эсе, ол ишни арсарсыз толтурургъа эм жаш тёлюню патриот жаны бла юйретиуге керегин белгилеген эдиле.  

Шёндю биз Сауутланнган кючлерибиз бла, Илияс эм аныча жигит  жашларыбыз бла ёхтемленирге боллукъбуз. Энчи аскер операцияда аскер борчларын толтургъанлагъа жамауатны болушлукъ этиую халкъны бютюн бирикдиреди. Алагъа кюн сайын керек бола тургъан затланы автоколонна бла ашырыу эм юйюрлерине, къыралны эм бош адамланы жанындан себеплик тапдырыу тёреге айланнганды. Ол ишни республиканы оноучусу Казбек Коков къолгъа эртте алгъанды  эм тийишлисича къурагъанды республикада. Аны бла байламлы энтта бир юлгю: КъМР-ни Парламентини депутаты Байсыланы Темиржанны СВО-гъа къатышханлагъа болушлукъ этген ишин къырал Башчыбыз да аны Кремльге чакъырып окъуна белгилегенди.

Эсигизде эсе, деменгили къыралыбыз чачылгъанда, Запад бизге хар не бла да болушурукъду, аны башчыларыны айтханларына тынгылап, анда жюрюген эриши адетлени, къылыкъланы алып тургъанбыз. Ол угъай эсе, билимибизни, маданиятыбызны окъуна ол къыралланы мардаларына келишдирирге кюрешгенбиз, битеу дуниягъа айтылгъан культурабыз бла илмубуз болгъанын да унутуп.

 Бу арт кезиуде хар зат да туура болгъанды, Западны бизге къаллай кир ниетлери болгъанларын ангылагъанбыз. Тюз бурунубузну тюбюнде Россейге къажау кюрешни бардырыр ючюн Украинаны халкъын бизге чюйре ниетлеге юйретип тургъандыла. Ол жумуш бир  неда эки жылгъа этилмегенди. Шёндю ачыкъ болгъан билдириулеге кёре, Украинада жашагъан бандеровчуланы  деменгили къыралыбыз оюлгъан кюнден хазырлап тебиреген эдиле ала.

 Мен оюм этгеннге кёре, бу шёндюгю болум адамланы бир бирге жууукъ этгенди. Биз, алгъын заманладача, къайгъыларыбызгъа жарсый, акъны къарадан, ётюрюкню кертиден айыра, жалгъан затланы да иги сезе башлагъанбыз. 

«Энчи аскер операция Украинада тохташдырылгъан режимни тюрлендирирге деп башланнган эди, артда уа ол коллектив Запад бла урушха айланып къалгъанды. Ол себепден, къаугъа белгиленнген мардадан асламыракъ барлыкъды, аны битеу борчлары толтуруллукъдула, бек алгъа Украинаны аскери Донбассдан кетерге керекди»,- деп билдиргенди къырал Башчыбызны пресс-секретары Дмитрий Песков  бу кюнледе Абу-Даби  шахарда Россейни, АБШ-ны эм Украинаны араларында бардырылгъан сёлешиуледен сора. 

    Болум СВО-да тюрлене башлагъанлы, Украинагъа тохтамай болушлукъ этип тургъан къыралланы къаууму да арт кезиуледе сокъурана, аскер сауутлары да бошалып, ахча болушлукъну да бермей тохтагъандыла. Венгрияны Башчысы Виктор Орбан Зеленскийни аманлыкъчы ишлерини юсюнден башха политиклеге ангылатып кюрешеди. Болсада, ала аны хар затын да кечедиле, Россейге къажау сюелсин ансы, бизге башха тюйюлдю деген акъылда Украинагъа «оюлгъан экономикасын ёрге сюерге деген мурат бла» 800 миллиард доллар берирге хазырдыла, бек сейири уа ол ахчаны къайдан алыргъа билмейдиле. Зеленский аллай бирни беригиз дегенди…  

Дагъыда Англияны бла Францияны оноучулары Стармер бла Макрон  жууапсызлыкълары бла барысын да озгъанларын кёргюзтгендиле.  Асыры адыргыдан, энчи аскер операция да бошалгъынчы окъуна аскерчилерин Украинагъа ашырыргъа кюрешедиле.  Алай РФ-ни МИД-ни оноучусу Сергей Лавров аланы аскерчилери тюз ары киргенлей, жокъ боллукъларын эсгертгенлей, бир кесек сагъыш этип башлайдыла, сора уруш бошалгъандан сора жиберлик болурбуз, деп билдиредиле. Болсада, РФ Президенти Владимир Путин аны да унарыкъ тюйюлдю, Украинада тыш къыраллы аскерчиле бир заманда боллукъ тюйюлдюле, деп бир ненча кере чертгенди.  Къысхасын айтханда, Запад политикле бир терк унутхандыла  Экинчи дуния урушда совет аскер   фашизмни аркъасын къалай ууатханын.    

 Арт жыллада дуния иги да тюрленнгенди. Алгъын  бир къауумла Россейге къажаулукъ ишлерин жашырын  этип тургъан эселе,   энди  бир затны да жашырмайдыла. Ол жаны бла ал сатырда Прибалтика республикала, Финляндия, Польша барадыла, бу кюнледе алагъа ёмюрде Россей бла уруш этмеген, Норвегия да къошулгъанды. Ётюрюк хапарла марда болуп къалгъандыла, алгъын къыралланы араларында этилген келишимле да бир затха турмайдыла. Русофобия асыры жайылгъандан, Россей бла Къытай бир кесекден Гренландиягъа чабаргъа боллукъдула деп, болмагъан жерде къайгъы чыгъаргъандыла бу кюнледе.

Насыпха, шёндю аллай жалгъан хапарлагъа европалы къыралланы халкълары да ийнанмайдыла, аланы политиклери ёз экономикаларын тозуратып, халкъларын къыйнап тургъанларын иги ангылайдыла. Ала Украинагъа тохтаусуз ахчаны тёгюп тургъанларына къажау сюелип тебирегендиле.  Францияны фермерлери асыры амалсыздан не этерге билмей, тоннала бла тууарларындан чыкъгъан кирни тракторла бла   Украинаны посольстволарыны алларына элтип къуйгъандыла.