Туризмден аслам файда тюшгенди

Муниципал бюджетлеге турист налогдан тюшген файданы тергеуде Къабарты-Малкъар Россейде алчы 10 регионну санына киргенди, аны юсюнден республиканы Курортла эм туризм министерствосундан билдиргендиле.

Налогладан келген хайырны эсеплери Къырал Думаны Туризм эм туризм инфраструктураны айнытыу жаны бла комитетини жыйылыуунда чыгъарылгъандыла. Айтылгъаныча, былтыр Къабарты-Малкъарны муниципалитетлеринде турист налогдан 28 миллиондан аслам ахча жыйылгъанды. Аны алыуну юсюнден норматив-право актла 94 муниципал къуралыуда жарашдырылгъандыла. Файданы асламысы – 17 миллион сом – Нальчикни бюджетине келгенди, 9,7 миллион – Элбрус районнукъуна, 500 минг а Черек районда къалгъандыла. Быйылгъа файданы бу тюрлюсюн 42 миллионнга жетдирирге умут барды.

Эсигизге салайыкъ, республикабызны ара шахарында турист налог 2025 жылны 1 январында кийирилгенди, ызы бла уа аны муниципалитетле да дурус кёргендиле.