Уу адамны битеу санларына жайыладыла

Бу ыйыкъны Россейни Саулукъ сакълау министерствосу онкология аурууланы профилактикасына жоралагъанды.

 Ёпкеледе рак башланнган кезиулени бешден тёртюсю адам тютюн ичгенини хатасындан башланнганын билемисиз? Аны къоркъутур, эс бурдурур ючюн айтмайбыз, ол медицинада тохташдырылгъан шартды, дейди бизге КъМР-ни Саулукъ сакълау министерствосуну Психиатрияны бла наркологияны клиника арасыны врачы-наркологу Олег Хацуков.

- Онкология асламында тютюнню хатасындан башланады, аны ичген кезиуде чыкъгъан тютюн бла канцерогенле адамны битеу санларына жайыладыла, тамакъны, ауузну, аш орунну, бюйреклени, ашхын тюбюнде безни бузадыла,-дейди нарколог.

 Алимле тохташдыргъанларыча, тютюнде 7 мингден кёп химиялы элемент барды, аладан бек аздан 70-си канцерогендиле. Ала адамны ДНК-сын бузадыла.

- Алай тютюнню къойгъанны саулугъу олсагъат  ызына къайтады. Бир жылдан аны жюрек-къан тамыр системасы тапландырылады, 5-10 жылдан а рак башланырыгъына къоркъуу азаяды. Ол себепден саулугъгъузгъа жууаплы болуп, аны къояргъа керекди, алай бла сиз бу керексиз къылыкъдан къарыулу болгъаныгъызны кёргюзтюрюкдю. Алай   кесигиз болалмай эсегиз, бизни клиникада сизге болушургъа битеу онгла бардыла,-дейди Олег Хацуков.