Жолланы игилендириуге - 6 миллард сом

Кёп болмай КъМР-ни Транспорт эмда жол мюлк министри  Аслан Дышеков Регионнга оноу этиу арада (ЦУР) тюзюнлей эфирде ведомствону ишини юсюнден хапарлагъанды эм  жамауатны жарсытхан соруулагъа да жууапла бергенди.

Ол  санда «Жашау этерге инфраструктура»  миллет проект бла байламлы тамамланнган  эм этилирге керек ишлени да  айтханды. Транспортну жангыртыугъа, объектлени игилендириуге эм башха соруулагъа да  эс бурулгъанды.

   Аслан Заурбекович, былтыр этилген ишлени юсюнден айта, сагъынылгъан кезиуде 50 чакълы жол объект мардалагъа келиширча этилгенлерин  сагъыннганды. Ишле миллет проектни чеклеринде бардырылгъанларын, аны бла бирге  республиканы жол фондуну ахчасына тийишли ишле 15 элде тамамланнганларыны да къошханды. 

Быйылны юсюнден айтханда, жангы миллет проектге кёре, 2030 жылгъа районланы барында да жолла мардалагъа келиширча боллукъдула. 

 Эм магъаналы объектлени юсюнден айтханда, ала он чакълы бардыла. Ол санда Терк районда Хамидие элде 5 километр чакълы жол жангыртыллыкъды.  Андан сора да, Малка – Ингушли жолда да Кичибалыкъгъа бла Сармаково эллеге баргъан 7 километр жолгъа  тынгылы ремонт этилликди. 

Черек районда да Эски Черекден Псыгансугъа баргъан жолну кесегине къараллыкъды. Бюгюнлюкде подряд организация бла келишим этилгенди. Аны себепли жылыла келгенлей ишле башланырыкъдыла.
Нальчик – Майский жолда да Къара Черекни Май район бла чегине дери кесегине тынгылы ремонт этилликди. Бюгюнлюкде къурулуш организация ишлени башларгъа хазырды.
Аны бла бирге кёпюрлени жангыртыугъа да аслам эс буруллукъду. Аны чеклеринде Терек шахар бла Александровская элни арасында Терк сууну кёпюрюне тынгылы ремонт этилликди.  Бусагъатда объектде ишле башланнгандыла. Андан сора да, Новопавловск – Прохладный – Моздок трассаны 12,5 километрине къараллыкъды. Ол санда юч кёпюр ишленирикди, аланы проектлери хазыр этилип, ишле башланнгандыла.

Беш жылны ичинде Аргудан – Александровская жолну  Озрек элге дери кесеги жангыртыллыкъды. Дагъыда башха уллу объектледен бири Кичибалыкъдан Жылы суулагъа дери таш жолду. Аны  24 километр кесегине асфальт салып игилендирилликди.  Бусагъатда аны проекти этиле турады. Эки жылдан тийишли ишле башланрыкъдыла, объект бир жылгъа хайырланырча боллукъду.

Дагъыда  2027-2029 жыллада Экинчи Чегемден башлап  федерал трассаны 60 километрден артыгъы жангыртыллыкъды. Герпегежде да жолланы тапландырырча мадар этилликди. Жууукъ заманда подряд организацияны сайларча конкурс бардырыллыкъды.

Быйыл Нальчикни транспорт ауурлукъдан бошайтырча, шахаргъа кирмей барырча эки жол ишленирикди. Проектге кёре, ала Урван райондан Перинатал арагъа эм  Шалушкадан  Нальчикге тартыллыкъдыла. Экиси бла да байламлы проектле жарашдырыла турадыла.  
Жамауат транспортну жангыртыугъа да аслам эс бурулады. Сёз ючюн, буруннгу жыл шахаргъа 44 улоу алыннганды. Болсада  программагъа кёре,  2030 жылгъа дери аланы 85 проценти жангыртылырча мадар этилликди.
Андан  сора да,  федерал проектге кёре, 2026-2028 жыллада  "Нальчик" халкъла аралы аэропортну самолётла учхан жолун, перронну, рулеж жолчукъланы  эм башха инфраструктурасын да игилендирирча ишле тамамланырыкъдыла. Сагъынылгъан жумушлагъа  4,1 мллиард сом бёлюнюрюкдю. 

Маршрутланы айнытырча да мадар этилликди. Былтыр республика регионланы арасында рейслени айнытырча субсидия бёлген программагъа къошулгъанды.  Анга кёре Нальчикден  Сочи эм  Къазан шахарлагъа  учарча онг къуралгъанды. Быйыл аны чеклеринде Нальчикден Къазаннга  рейс ишлеп башларыкъды. Дагъыда Нальчикден Сочиге, Санкт-Петербургга, Стамбулгъа эм  Анталиягъа рейсле да ачыллыкъдыла.