Къырал эмда жамауат жумушла бютюн тынгылы толтурулурча

Кёп болмай Москвада "Конгресс-центрде" Къырал эм муниципал жумушланы тамамлагъан араланы   IX битеуроссей форумлары болгъанды.  Ол РФ-ни Экономиканы айнытыу министерствосу бла Москваны Правительствосу къурап бардырылгъанды. Аны магъанасы - федерал эм регионал власть органланы, «Мои Документы» араны специалистлерин эмда цифралы жумушла жаны бла экспертлени бирикдирирге, бу ишни игилендириуню амалларын излерге. 

Жыйылыуну РФ-ни экономиканы айнытыу министри Максим Решетников бардыргъанды. Кенгешге РФ-ни Къоркъуусузлукъ жаны бла советини таматасыны орунбасары   Дмитрий Медведев, РФ-ни Президентини Администрациясыны башчысыны биринчи орунбасары Сергей Кириенко, РФ-ни Правительствосуну Председателини орунбасары, Правительствону Аппаратыны башчысы Дмитрий Григоренко, Ара банкны таматасы Эльвира Набиуллина, «Сбербанк России» ачыкъ акционер обществону президенти Герман Греф спикерлеча къытышхандыла.

Бу жол жыйылыуда онбеш жылны ичинде Кёп функциялы араланы ишлеринде не тюрлениуле болгъанларына къаралгъанды. Ол санда цифралы амалланы сингдириуню, адамгъа энчи кёзден къарауну, жумушланы санына къошула барыуну, федерал эм регион органланы араларында байламлыкъла къурауну соруулары сюзюлгендиле.

Форумну кезиуюнде Дмитрий Григоренко Къырал эм муниципал жумушланы тамамлагъан кёп функциялы араны (МФЦ) ишин айнытыуда уллу къыйын салгъаны ючюн аны Къабарты-Малкъарда бёлюмюню таматасына, Аслан Афауновха ыспас этип, ыразылкъ къагъыт бергенди. 

Эсге сала айтсакъ, былтыр КъМР-ни сагъынылгъан арасыны бёлюмлерине тюрлю-тюрлю соруула бла 1,6 миллион чакълы адам келгенди эм сёлешгенди. Сагъынылгъан кезиуде араны специалистлери 810 минг жумушну тамамлагъандыла. Ол буруннгу жыл бла тенглешдиргенде, 20 процентге кёпдю. Аланы иги кесеги социал бёлюм, Росреестр, ич ишле органла бла байламлы болгъандыла.

Аны бла бирге, алгъаракълада Нальчикде Перинатал арада МФЦ-ны бёлюмю ачылгъаны мында жатхан аналагъа ахшы себеплик этерикди. Ол санда тышына чыкъмай, сабий туугъанына шагъатлыкъ къагъыт, борчлу халда медицина страхование, СНИЛС, ИНН дегенча керекли документ къоллу болаллыкъдыла.