Мектепледе агротехнология классла ачыладыла

Былтыр "Аш-суу жаны бла къоркъуусузлукъну жалчытыу" миллет проектге кирген "Агропромышленный комплексде  кадрла"  деген федерал программагъа кёре  Красноармейское, Кишпекде, Кубаны биринчи номерли мектебинде эм Тырныаууз шахарда Отар улу Керимни атын жюрютген биринчи номерли лицейинде  агротехнология  классла ачылгъандыла. Алагъа  7-11 класслада окъугъан 150-не жууукъ школчу  жюрюйдюле. Ала   физика, химия, биология,   математика эм эл мюлкде хайырланнган  жангы технологияланы  да теренирек окъуйдула.  Ол санда эл мюлк жаны бла соруулагъа  аслам эс  бурулады, проектле эм  тинтиу ишле да  бардырыладыла. 

 Бюгюнлюкде  агротехнология классла  тийишли оборудование бла жалчытылыннгандыла. Анга деп бюджетден 12,1 миллион сом бёлюннгенди.  

Проектни Къабарты-Малкъар къырал аграр университет республиканы Эл мюлк эм Жарыкъландырыу эмда илму министерствосу бла бирге  бардырады. Анга агропромышленный комплексде уруннганланы арасында  иш бла жалчытханла да тири къатышадыла.

  Билим бериу программаны жетишимли  ётгенлеге аграр вузгъа кире туруп къошакъ халда 10 балл берилликди. 

КъМР-ни Эл мюлк министерствосунда айтханларына кёре, быллай классла саулай къыралда къурала барадыла. Аны магъанасы – аграр усталыкълагъа сейирлерин  бурурча, эл мюлк бёлюмге специалистлени хазырларча эм урунургъа  онгла къуралырча этергеди.