Жарыкъ эм къоркъуусуз да болурча

Кёп болмай Къабарты-Малкъарны Регионнга оноу этиу арасына (ЦУР) социал сетьледе кюн сайын былайтын жюрюген водительле Нальчик – Майский жолда кече жарыкъ болурча бир мадар этилирин айтып тарыкъгъандыла.  Ала билдиргеннге кёре, трассаны бир-бир жерлеринде чыракъла кюйюп  неда сынып жанмайдыла, ингирде уа аны хатасындан  жунчургъа тюшеди. Болсада  алайлагъа чыракъла салырча онг табылса,  бек иги боллугъун жазгъандыла. 

Араны ишчилери болумну КъМР-ни Транспорт эмда жол мюлк министерствосуна билдиргенлеринден сора  сагъынылгъан жерде токчула  энчи техниканы хайыры бла бузукълукъну кетерирча  жумушну тамамлагъандыла.   Аны кезиуюне чыракъланы алышыргъа, ремонт этерге да  тюшгенди. Алай бла къысха заманда адамланы тилеклери толтурулгъанды эм водительле бла  жаяу жюрюгенле да  къоркъмазча болгъанды.  

Эсге сала айтсакъ, Регионнга оноу этиу ара офис халда ишлемейди, «Инцидент менеджмент» бир тюрлю соруугъа эс бурур ючюн, ол социал сетьлени биринде жазылыргъа керекди. Ол санда кемчилик тынгылыракъ ачыкъланса игиди.