«Кишиликни, чыдамлыкъны, ётгюрлюкню да юлгюсю болгъанлай къаллыкъды»

2 февральда Россей къыралыбызны тарыхында эм магъаналы кюнню белгилейди – Сталинград ючюн сермешде немис-фашист аскерле толусунлай ууатылгъанлы 83 жыл болады. Аны бла байламлы КъМР-ни Башчысы Казбек Коков МАХ-да.

«Сталинград ючюн сермеш Уллу Ата журт урушну кезиуюнде эм уллу   къанлы къазауатладан бири болгъанды. Ол 1942 жылны 17 июлунда башланып 1943 жылны 2 февралына дери баргъанды.

Волга сууну жагъаларында баргъан къызыу сермешни фашист уучлаучуланы ууатып, Хорламны болдурууда магъанасы айтып-айтмазча уллуду. Ол Уллу Ата журт урушну барыу халын арталлыда тюрлендирген эди.

Сталинград ызда къазауатны совет аскерни хорламы бла бошалгъаны Шимал Кавказны азатлау сермешле бла алгъа барыргъа да жол ачхан эди. Къызыу сермешледен сора Къабарты-Малкъар, къыралны къыбыла жаныны башха тийрелери да гитлерчи аскерледен азатланнгандыла. Фашистлени Кавказны жер тюбю байлыкъларын къолгъа этер планлары оюлгъандыла. Ызы бла аскерлерибизни алгъа барыу сермешлери башланнгандыла.

Ол къанлы эмда деменгили къазауатда солдатларыбыз бла офицерлерибиз, Сталинградны халкъы да бир заманда да болмагъанча уллу кишиликни, чыдамлыкъны, ётгюрлюкню эмда битеулю жигитликни юлгюсюн кёргюзтгендиле.

Сталинград ючюн къаузауатха Къабарты-Малкъарны кёп уланлары да къатышхандыла. Ала жанларын-къанларын аямай сермешгендиле, батырлыкълары, кишиликлери бла да атларын айтдыргъандыла. 

Биз Сталинград сермешни жигитлерини алларында баш урабыз. Бу шахар ючюн къазауатда болдурулгъан хорлам Россейни келир заманы ючюн бек уллу жигитликни юлгюсюча эсде къаллыкъды эмда ол эс кёп миллетли халкъыбызны бирикдиргенлей турлукъду»,- деп жазгъанды Казбек Коков.