Тири тиширыулагъа – бизнес-форум

Жууукъ заманда, 7 февральда, Нальчикде «Тири тиширыула. Тамбланы мурдору болгъан сынам» деген регионла аралы биринчи бизнес-форум боллукъду. Анда организацияланы башчылары жаш предпринимательле бла ушакъла бардырлыкъдыла, регионда бизнесни айнытыуну амалларын сюзерикдиле.

Форум «Ишчи Россей» битеуроссей жамауат биригиуню регионда бёлюмюню эмда республиканы профсоюзларыны федерациясыны башламчылыкълары бла ётдюрюледи. Ол бизнесде Къабарты-Малкъардан, Къарачай-Черкесден, Шимал Осетиядан, Шимал кавказны бирси регионларындан да жетишимле болдургъан тиширыуланы, власть органланы, ишчи биригиулени, регионну айнытыу жаны бла институтланы келечилерин бирикдирликди. «Регион программалагъа кёре угъай, жууаплылыкъны сезе билген адамланы къыйынлары бла айныйды» деген чакъырыуну башха салып, жыйылгъанла келир эки жылда оноу этиу, файда, система амалланы хайырланыу, управлениягъа жалгъан интеллектни къошуу, эл мюлкню игилендириу, туризмни экосистема халда айнытыу, кадрла бла ишлеу эмда къырал бла байламлыкъла жюрютюу жаны бла магъаналы соруулагъа къарарыкъдыла. Профсоюзланы федерациясыны башчысы Фатимат Амшокова белгилегенича, форум тиширыуланы усталыкъларында ёсерге, бизнеслерин игилендирирге себеплик этгенинден сора да, саулай да регионну кёп заманнга айныууна болушурукъду.    

Форумну ётдюрюуге маркетолог, бизнесни айнытыу жаны бла эксперт Гузеланы Индира жууаплыды. Анга къатышыргъа сюйгенле https://clck.ru/3RTgTh ссылка бла эсепге тюшерге керекдиле, соруула бла 8 928 368 88 85 телефоннга сёлеширге боллукъду.