Эки пенсия кимлеге бериледи?

Адамны талай тюрлю пенсия алыргъа эркинлиги болса, анга аладан жаланда бирин тёлейдиле. Алай бир-бирледе уа инсан эки тюрлю пенсия алыргъа боллукъду - аллай онглары талай категориялада барды. Ол санда аскер къазауатлагъа къатышхан кезиуде сакъат болгъанлада, ауушхан аскерчилени юйдегилеринде, аскерчи пенсиячылада, дегендиле Къабарты-Малкъарда МФЦ-да.

Инсанланы сакъат болгъан талай къауумуна къырал аллай эмда абаданлыкъ пенсияны тёлерге боллукъду. Алагъа ма была тийишлидиле:

- аскерде жара алгъанларыны хатасындан сакъат болгъанла;

- кеслери эркинликлери бла къуралгъан аскер биригиулеге къатышып, контракт къуллукъну кезиуюнде жаралы неда ауруулу болуп сакъатланы санына тюшгенле;

- ДНР-ни бла ЛНР-ни аскер биригиулерини къауумунда аскер къазауатлагъа неда энчи аскер операциягъа къатышып сакъат болгъанла;

- Уллу Ата журт урушха къатышхан сакъатла;

- «Блокада Ленинградда жашагъан» белги, «Къуршоуланнган Севастопольну инсаны» белги, «Къуршоуланнган Сталинградны инсаны» белги бла саугъаланнган сакъат инсанла;

Юйюрню кечиндирген аскерчи неда кеслери эркинликлери бла къуралгъан аскер биригиулеге къатышхан инсан къуллукъларын толтургъан кезиуде неда аскер жараны хатасындан ёлген эселе, аланы юйдегилерине да эки пенсия тёлерге боллукъдула. Аны ма была алыргъа эркиндиле:

- ата-анала;

- ёлгенни юйдегиси, жангыдан юйюр къурамагъан эсе;

- сакъат сабийле;

- сабийликден бери (I эм II къауум) сакъат болгъанла, кеслери да ёлгенни сабийлери.

Толу тизмени Социал фондну сайтында табарыкъсыз.

Аскерчи пенсиячыла тёлеуню кюч ведомствону атындан ала эселе, абадан болсала, аллай пенсияны ма бу излемлени толтурсала алаллыкъдыла:

- эр кишиле – 65, тиширыула уа – 60 жыллары толса;

- аскер къуллукъгъа саналмагъан жерледе эм азындан онбеш жыл ишлеп кетген эселе;

- энчи пенсия коэффициентлери (ИПК) эм азындан 30 болса.

Быллай эркинлик дагъыда сынам ишлеге къатышхан лётчиклеге эмда къырал федерал къуллукъчулагъа да бериледи.