«Ленинградны азатлау - кёп миллетли къыралыбызны халкъларыны бирликлерини аламат юлгюсю»

 27 январьда къыралыбыз Россейни аскер махтаулугъуну кюнюн – фашистле 872 кюнню къуршоугъа алып тургъан Ленинградны толусунлай азатланыууну 82-жыллыгъын белгилейди. Аны бла байламлы КъМР-ни Башчысы Казбек Коков кесини телеграм-каналында былай жазгъанды:

«1944 жылны 27 январында Къызал аскер къыралыбызны шимал жанындагъы ара шахарын эркин этгенди. Ол  Уллу Ата журт урушну тарыхында бек махтаулу эмда бек бушуулу кюнюне саналады. Эки бла жарым жылны ичинде шахарчыла, къызыл аскерчиле да кюйсюз душман бла кюн сайын къаты кюреш бардыргъандыла.

Эсигизге салайым, Ленинградны къоруулагъанланы араларында Къабарты-Малкъардан да мингден артыкъ адам болгъанды.

 Ленинградчылагъа бек уллу къыйынлыкъла сынаргъа тюшгенди – жууукъларыны бла ахлуларыны ажымлы ёлгенлерин, ачлыкъ, жаланнгачлыкъ, он сагъатла бла тохтамаучу топ-окъ атышыуланы.

Къызыл аскерни солдатларыны бла офицерлерини эмда айтхылыкъ  шахарда жашагъанланы бир да болмагъанча уллу жигитликлери уа Уллу Ата журт урушну тарыхында энчи бетни алады.

Аскерчилени кишиликлерини эмда шахарчыланы заводлада бла госпитальлада кече-кюн да уруннганларыны, аланы адам ийнаналмазча чыдамлыкъларыны бла батырлыкъларыны хайырындан къаты къуршоуну сынжырларын юзерге, душман артха туракъларча этерге къолдан келгенди.

Таурухлу шахарны азатлар ючюн жанларын бергенлени атлары бир заманда да унутуллукъ тюйюлдюле. Адам чыдаялмазча  сынауланы намыслары, сыйлары бла кётюрген ленинградчыланы жигитликлерине баш урабыз. Шахарны къоруулагъанланы атлары келир тёлюлени да эслеринде къаллыкъдыла, махтау бла айтыллыкъдыла.

Ленинградны азатлау – кёп миллетли къыралыбызны халкъларыны бирликлерини аламат юлгюсюдю.

Ленинградны къадары, аны къоруулагъанланы унутмау - ала барыбызгъа да бек уллу магъананы тутхан затладыла. Нек дегенде ол шарт бюгюнлюкде да бизни жигитлерибиз – Хорламны келтиргенлени туудукълары – шёндюгю агрессорлагъа къаты жууап берликлерине ышаныулукъ береди.

Ленинградны жигитлерине ёмюрлюк махтау!».