Къышда да ариулукъдан айырылмазча

Къышда тиширыугъа ариулугъун сакълагъан къыйыныракъды, болсада бардыла аллай амалла. Аланы юсюнден косметолог Хуболланы Мадина айтады

- Сууукъ кюн орамдан сууукъсурап келсенг, жылыныргъа деп исси суугъа кирлигинг келеди. Алай этерге ахырысы бла да жарамайды. Ол саулукъгъа осалды. Андан сора да, жууунсанг, этингде мылылыкъны сакълагъан тери жауунг жууулады, этинг къургъакъсып, къабукъ-къабукъ болады.

Алайсыз да къышда сууукъ хауадан бла желден адамны териси кереклисича мылылыкъны сакълаялмайды. Аны себепли, жылыныр ючюн,  жууунургъа сюе эсегиз, мытыл сууну хайырланыгъыз. Аны зараны боллукъ тюйюлдю. Ызы бла уа жылы азыкъ ашап, исси чай ичсегиз, къалтырауукъ не болгъанын терк унутурукъсуз.

Адамны бети къыш сууукълагъа тёзюмлю болур ючюн, жылны бу кезиуюнде аны исси эм сууукъ суу бла кезиу-кезиу жууаргъа керекди. Башыгъызны энишге этип, ууучугъузгъа суу алып, аны бетигизге къарыуугъуз бла силкип чачыгъыз: алгъа бир 4-5 кере исси сууну, артда уа 6-7 кере-сууукъну. Теригиз анга юйренсе, иги чыдарыкъды.

Бетигизни териси сууукъ хауа болумгъа тёзюмсюз эсе, анга алгъа жан жаулукъну исси сууда жибитип, сыгъып, бетигизге бир 2-3 минутха салыгъыз, андан сора уа буз чёргеп сылагъыз. Бу процедураны 4-5 кере къайтарыгъыз.

Сууукъдан къол тышларыгъыз къызарып, кюйдюрген этгенча, къызып ачыта эселе, териси жарылып, аурутханы баямды. Терини жумушатып, ачыгъанын сел этер ючюн, буруннгулула чёплеу неда сары жауну хайырланып болгъандыла. Бусагъатда уа тюрлю-тюрлю кырдык ийис этген кремле жарашдырадыла.

Къышда уа къаллай крем сайларгъа керекди? Кесине къайгъыргъан тиширыуну жанында къасмакъ (облепиха) неда кокос жау къошагъы болгъан кремлери болургъа керекди. Кокосдан этилгенни жакъсанг, ол къолларынгда иги жутулады, жумушатхан да этеди. Суу бла жуусанг - жууулмай, къол къапланы кийгенде, тешгенде да, алагъа жагъылып кетмей, кёпге дери сакъланады. Къасмакъ жау къошулуп этилген кремде уа витаминлери кёп болгъаны себепли ол къолларыгъызны ууакъ жарачыкъларын терк окъуна сау этерикди.