Ичги семиртирге боллукъду

Бу ыйыкъны Россейни Саулукъ сакълау министерствосу   калорийлени санаугъа жоралагъанды. Ол себепден къыралда жамауатха саулукъгъа  хайырлы аш-сууну юсюнден толу хапар билдириледи.

КъМР-ни Саулукъ сакълау министерствосуну  Психиатрияны бла наркологияны клиника арасыны врачы-терапевти Мадина Макоева уа бу ыйыкъны чеклеринде ичгиде болгъан калорийлени эмда ала адамны саулугъуна салгъан заранны юсюнден айтады.

 Мадина Маратовна билдиргенича, этил спиртни 1 граммында 7  килокалорий барды –   ол жауну граммына тенглиди (аны 1 граммында 9 килокалорий барды). Алай эсе уа,  ичги затла адамны санларына ауурдула.

- Спиртде  калорийле къурудула, ала адамны санына бир тюрлю хайынр келтирмейдиле – витаминлери, минераллары жокъдула, адамны тойдурмайдыла,-дейди врач.

Ол билдиргенича, татлы ликёрну 100 граммында    327 ккал, коньякда  240 ккалгъа жууукъ, аракъыда    235 ккал жууукъ, адамла къызыу заманда  ичерге бек сюйген сырада уа    35- 50 ккал бардыла. Субай болургъа излегенле ичги санлагъа келтирген хата бла бирге бу калорийле арыкъ болургъа къоймагъанларыны юсюнден сагъыш этерге керекдиле. 

-  Айтханымча, ичгиде калорийле къурудула, ала адамгъа кюч бермейдиле. Ол угъай, семиртген этедиле: адам ичген кезиуде ашагъан да кёбюрек этеди, ол жеринден тепмей, кёп заманны турады, алай бла ауурлугъуна къошады,-дейди ол.

Саулугъуна къайгъыргъан адам ичгини къояргъа, санлагъа хайырлы ашны ашаргъа, аны бла бирге уа тири болургъа керекди, деп юйретеди бизни ушакъ нёгерибиз.