Мирзеуден бай тирлик эм башха продукциядан да элпеклик къууандырады

Былтыр Къабарты-Малкъарны мюлклерини барында да  мирзеу эм къудору  битимледен бай тирлик алыннганын белгилерчады. Чыгъарылгъан эсеплеге кёре, аны ёлчеми 1,2 миллион тоннагъа жетеди. Ол, буруннгу жыл бла тенглешдиргенде, 4 процентге кёпдю.

Мирзеуден бай тирлик жыйылгъаныны магъанасы жерчиликде уруннганла кезиулю  жумушланы заманында тамамлагъанларыны себебинденди. Ол санда  качестволу урлукъну, семиртгичлени, мелиорацияны эм бийик производстволу  техниканы да тири хайырланнганларынданды.   

Белгилисича, республикада мирзеуню асламысы нартюхге жетеди. Быйыл андан  860 минг тонна жыйылгъанды неда хар гектардан 67,8 центнер. Буруннгу жыл бла тенглешдиргенде, ол 20 минг тоннагъа кёпдю.  

Бюгюнлюкде къылкъылыланы эм нартюхню да иги кесеги  Прохладна, Терк, Басхан  Зольск районлада ёседи. Саулай алып айтханда, алагъа мирзеуню 70 проценти жетеди.

Эсге сала айтсакъ, былтыр республиканы аш-суу жарашдырыучу предприятиялары суусапладан -7, аш-азыкъдан да- 0,4 процентге аслам чыгъаргъандыла.

Сагъынылгъан  кезиуде эм кёп  татлы ашарыкъла, ётмек бла булка, жау, сют, къаймакъ, бишлакъ, творог, тахта кёгетледен консервала, мал аш эм крахмал сатылгъандыла.