Келгенле кёлленип кетгендиле

Хасанияны Маданият юйюнде Малкъар Россейге  кеси ыразылыгъы бла къошулгъанлы 199-жыллыгъына аталып концерт болгъанды.

Бек алгъа сахнагъа Россейни, Къабарты-Малкъарны, халкъыбызны да байракъларын кётюрюп, миллет кийимлери бла къызчыкъла бла жашчыкъла чыкъгъандыла. Аланы ызларындан а сахнагъа Хасанияны администрациясыны башчысы Азаматланы Къайсын хар кимге да насып, эсенлик тежегенди, байрамны тарыхындан бир ненча шарт келтиргенди.

- Халкъыбызгъа бу магъаналы байрамды. Ол ата-бабаларыбыз бурун заманда тюз сайлау этгенлерини белгисиди. Аланы акъыллы оноу этгенлерин харкюнлюк жашауубузда  кёрюп келебиз. Бу байрам бла барыгъызны да къызыу алгъышлайма, республикабызны, элибизни да битеу  юйлеринде жарыкъ чыракъла жансынла, жырла, къууанчлы хапарла эшите турурча болайыкъ», - дегенди элни башчысы. 

Ол кюн 16-чы номерли мектепни  окъуучулары Мечиланы Казимни, Къулийланы Къайсынны, Отарланы Керимни, Зумакъулланы Танзиляны эмда башха жазыучуларыбызны назмуларын айтхандыла, тюрлю-тюрлю сахна оюнчукъла кёргюзтгендиле. «Минги-Тау», «Басият» тепсеу ансамбльле, жырчыла Жаникаланы Эльдар, Нурлан Жамалдинов, Ислам Дзугулов, Фатимат Дышекова уа къараучуланы аламат тепсеулери, ариу жырлары бла да  къууандыргъандыла.