Экономикада ал кёрюмдюлени сюзгендиле эм быйылгъы жылны муратларына къарагъандыла

КъМР-ни Башчысы Казбек Коков республиканы экономиканы айнытыу министри Рахайланы Борис бла ишчи тюбешиу бардыргъанды. Аны кезиуюнде озгъан жылда социал-экономика айнытыуну кёрюмдюлери эм быйылгъы жылгъа муратла сюзюлгендиле. Аны КъМР-ни Башчысыны бла Правительствосуну пресс-службасы билдиреди.

Тюбешиуде деменгили инвестиция проектлеге къарагъандыла,  аслам эс ишчи жерле эм бюджетге налогла тюшюрлюклеге бурулгъанды. Андан сора да макроэкономика жаны бла ал кёрюмдюлени тинтгендиле. Энчи алып айтханда, ич регион продуктну ёсюуу орта эсеп бла тергегенде 5,9-6,2 процент болады. Эл мюлкде, промышленностьда, сатыу алыуда, къурулушда эм туризмде аслам ёсюм эсленеди.

Экономика тири айнып баргъаны себепли, гитче эм орта предприниматель иш бла кюрешгенлени саны 24 мингден атлагъанды, кеслери иш ачып башларын кечиндиргенле да 93,7 минг адам болгъандыла.

Къабарты-Малкъарда бла уллу миллет проектле жашауда бардырыладыла, ала Президентибиз Владимир Путинни башламчылыгъы бла башланнган эдиле. Озгъан жылда 43 регион проект тамамланнганды, ол санда 33 федерал эм регион ахчала да хайырланнгандыла. Быйылгъы жылда миллет проектлеге 14,8 миллиард сом бёлюнюрюкдю, аладан 11,5 миллиард сом федерал бюджетден, къалгъаны-3,2 миллиард сом республикалы бюджетден боллукъду.

Андан сора республикада инвестиция болумну игилендириу соруулагъа  къаралгъанды. Аны бла байламлы республикада «Россия» миллет араны регион бёлюмюн къурау бла байламлы план сюзюлгенди эм быйыл боллукъ Кавказ инвестиция форумгъа Къабарты-Малкъар къалай хызырланнганыны юсюнден соруугъа эс бурулугъанды, деп айтылады билдириуде.