Тамамланырыкъ жумушланы белгилегендиле

КъМР-ни Башчысы Казбек Коков Басхан районну администрациясыны таматасы Адиб Абрегов бла ишчи тюбешиу бардыргъанды. Тюбешиуню кезиуюнде муниципалитетде социал-экономика жаны бла соруула, ол санда быйылгъы жылны бюджети, регион эм муниципал программала да сюзюлгендиле. Аны юсюнден республиканы оноучусу кесини телеграм-каналында билдиргенди.

Районну эллерини комплексли айнытыуларыны юсюнден соруугъа энчи къаралгъанды.

Бюгюнлюкде районну ичинде жашауда бардырыла тургъан эм уллу инфраструктура проектледен бирине, Басханны группалы водопроводу саналады. Аны хайырланыугъа бериу районда жашагъанланы таза суу бла жалчытыргъа онг берликди. Быйылгъы жылда Куба элге узунлугъу 12 километр болгъан суу келген жангы ыз тартыллыкъды.

 Андан сора жолланы тийишли халгъа келтириу бла байламлы иш тохтаусуз бардырыллыкъды. Аслам эс районну билим бериу жети учреждениясында бардырыллыкъ тынгылы ремонтларына эмда мектепледе сабийлени жылы аш бла жалчытыугъа бурулгъанды. Бу эки соруу муниципалитетде энчи контрольда турады, деп айтылады билдириуде.