Экономиканы ал кёрюмдюлерин сюзгендиле эм быйылгъы жылны муратларына къарагъандыла

КъМР-ни Башчысы Казбек Коков республиканы Правительствосуну Председатели Мусукланы Алий бла ишчи тюбешиу бардыргъанды. Аны кезиуюнде асламлы макроэкономикалы кёрюмдюлеге къаралгъанды, бюджетни бёлюмлерини эм социал борчланы толтурууларына аслам эс бурулгъанды. Аны юсюнден регионну оноучусу кесини телеграм-каналында билдиргенди.

Андан сора федерал эм регионал программала миллет проектлени чеклеринде жашауда къалай бардырылгъанларына энчи къарагъандыла. Дагъыда шахарлада бла районлада жыйылгъан кир-кипчикни кетериу бла байламлы болумну юсюнден Оператив штабны иши сюзюлгенди. Бюгюнлюкге болум тюзелгенди, алай иш тохтаусуз барыргъа эм энчи контрольда турургъа кереклиси айтылгъанды.

Тюбешиуню кезиуюнде быйылгъы жылда къаллай бёлюмлеге эс буруллугъу белгиленнгенди. Ол санда инфраструктура проектлени, инвестицияланы келтириу бла ишни, турист бёлюмню комплексли эм эл мюлкню айнытыуну, шахар болумлада жашарча болумланы къурауну мындан арысында къалай бардырыргъа керекли амалла сюзюлгендиле.

Бек башы, экономиканы ёсюуюн, болдургъан жетишимлени эм алыннган сынауну да Къабарты-Малкъарда жашауну игилендириуге хайырланыргъа керекди. Башда айтылгъан жумушланы тамамларгъа КъМР-ни Правительствосуна къауум буюруу бергенме, деп айтылады билдириуде.