Зауукълукъну ичгиден угъай, тюбешиуден, ушакъладан алыгъыз

Жангы жылгъа тюбеу тёреле жамауатда эрттеден тохташхандыла – аланы баш белгилери уа оливье салат бла ингирде 24 сагъатда куранты ургъан кезиуде шампанскийни атдырып, аны ичиуду. Аны бла бирге уа тюрлю-тюрлю ашарыкъла хазырларгъа, столланы бай этерге кюрешебиз. 

-  Оливье, столичный, московский – салатланы атлары башхады, алай аланы арасында уллу башхалыкъ жокъду. Аны кёп туураргъа, эки-юч кюннге жетерча этерге кюрешебиз, алай ол терсди. Бир адамгъа ауузланыргъа 150 грамм  салат тамамды, айтханыма бюсюремегенле да болурла, алай ол саулукъгъа хата салмай, жетер тенгли ёлчемди. Дагъыда майонез салгъан эсегиз, салатны асыраргъа жарамайды, - дейди бизге КъМР-ни Саулукъ сакълау министерствосуну Психиатрияны бла наркологияны клиника арасыны баш врачы Ольга Удалова.

Андан сора да, байрамгъа хазырлана, сау кюнню жукъ да ашамай, ингирге дери тёзедиле кёпле. Ол да терс болгъанын айтады ушакъ нёгерибиз. «Йогурт, творог, алача женгил ашладан ауузланнган тюздю»,-дейди ол.

Ичгилени юсюнден айтханда, байрамны кезиуюнде да саулукъну унутургъа жарамайды. Шампанскийни орунуна сок ичерге болады, дейди Ольга Николаевна. «Алай  шампанскийсиз болалмай эсегиз, татлыны орунуна брют сайлагъыз. Дагъыда мардадан озмагъыз. Кёлюгюз аман этип, башыгъыз тёгерек айланып башласа, ичгини тохтатып, таза хауа бла солугъуз, лимон бла суу ичерге да болады. Дагъыда абсорбент дарманланы хайырланыргъа жарайды. Энтта бир жорукъ – ичгилени къатышдырмагъыз – шампанскийден башлагъан эсегиз, аракъыны къошмагъыз, ол саулукъгъа бек къоркъуулуду»,-деп юйретеди доктор.

 Ушагъыбызны ахырында Ольга Удалова окъуучуланы Жангы жыл бла алгъышлай, байрам къуру аш-суудан къуралмагъанын эсгертеди. «Ойнаргъа, тепсерге, бирге жыйылгъандан, сейир ушакъладан зауукълукъ табаргъа керекди. Жангы жыл саулукъ, тынчлыкъ келтирсин»,-дейди ол.