Даулашлы сорууланы сюзмезге кюрешигиз

Жангы жылгъы эм Рождество каникулла юйюрюбюз бла бирге болургъа, бирге солургъа берилген кезиудю.  Ол а жууукълукъ байламлыкъланы кючлерге онг береди, алай бу заманны ичинде даулашла да чыгъаргъа боладыла. Сау кюнню фатарда, юйде бирге туруу да сынауду, дейди КъМР-ни Саулукъ сакълау министерствосуну штатдан тышында специалисти - психологу, Психиатрияны бла наркологияны республикалы клиника арасыны психологу Галина Каргинова.

- 24 сагъатны биргебиз, ол бир жанындан коронавирус жайылгъан заманны да тюшюреди эсибизге,  ауруугъа чыдаялгъан эсек, солуу кюнлеге да тёзербиз,-дейди ол.

Солуу заман хайырлы болур ючюн, мен кесим эм юйюрюм не зат сюедиле, деген соруугъа жууапны излерге керекди, деп юйретеди ушакъ нёгерибиз. 

- Байрамлада не зат бла  кюреширге сюйгенигизни алгъадан хазырламасагъыз,  даулашла башланыргъа боллукъдула. Сёзсюз, сабийле бу заманда жомакъны, къууанчны сакълайдыла. Таматала уа башхача ётдюрюрге сюедиле. Аны ючюн келишиулюк излерге керекди,- дейди ол.

Он кюн алай кёп тюйюлдю, ала терк озарыкъдыла. Аны ючюн хар сагъатдан да хайыр алыргъа керекди.  Алай жылны ичинде арт болжалгъа салып тургъан ишлени барысын да бу он кюнню ичинде толтурургъа кюрешген терс болгъаны айтады ушакъ нёгерибиз. Дагъыда алгъын да даулашла туудургъан  сорууланы жангыдан сюзюп башламазгъа да чакъырады.

- Бу жолгъа дери келишалмагъан  эсегиз, шёндю да бир оюмгъа келлик тюйюлсюз, алай солуу заманны уа бир бирге ёпкелеп ётдюрюрге къоркъуу барды,-дейди Галина Евгеньевна.

Дагъыда ишге чыгъаргъа алгъадан хазырланыу игиди. «Бир эки кюнден ишге  чыгъаргъа тюшеригин ангыласакъ,  мыйыгъа бу болжалгъа юйренирге женгилди.  Ол заманда стресс да азыракъ боллукъду»,-дейди ол ушагъыбызны ахырында.