Солууну ючге бёлюгюз

Жангы жылгъы эм Рождество каникулла кезиуюнде солургъа, саулугъубузгъа, психикабызгъа хайыр алыргъа берилген заманды. Алай кёплерибиз  бу кезиуде юйден чыкъмай, диванда жатып, киногъа къараугъа, тюненеден къалгъан салатланы ашаугъа жоралайбыз.

- Солуудан сора барыбыз да ишге, окъуугъа чыгъарыкъбыз. Алай санларыбыз солуугъа юйренип, къыйналыргъа, стресс сезерге боллукъбуз. Аны ючюн а санларыбызны алгъадан хазырларгъа керекди, - дейди КъМР-ни Саулукъ сакълау министерствосуну Психиатрияны бла наркологияны клиника арасыны медицина психологу Амина Егожева.

 Ол юйретгенича, жангы жылгъы солуу кюнлени ючге бёлюрге боллукъду. Биринчи кюнлени жарыкъ ётдюрюрге, къууаныргъа, сюйгенигизни этерге жарайды. Жаланда кёлюгюзню бузмаз ючюн, ауурлугъугъузну ёнчелемегиз, байрам ашладан сора къаллай бир къошханыгъызны тергемегиз, деп юйретеди ушакъ нёгерибиз.

Кюнлени экинчи жарымын паркда жаяу жюрюуге, театргъа, киногъа, музейге барыргъа,  байрам жыйылыулагъа, нёгерлерин, жууукъларынг бла тюбешиулеге, къууанчха жораларгъа боллукъду.

- Ахыргъы кюнледе уа солуугъа дери болгъан низамгъа къайтыргъа керекди. Бу заманда юй жумушла бла кюреширге боллукъду, ол ишге женгилирек чыгъаргъа болушурукъду. Алай бла санларыгызны, психикагъызны да ишчи низамгъа алгъадан хазырлап башлагъан хайырлыды,-дейди Амина Егожева.