Солуу кезиуден хайыр алыгъыз

Жангы жылгъы солуу кезиуде адам санларын тазалагъан бла бирге психикасын да игилендирирге иги кезиудю.

- Байрамлагъа хазырлана, башыбызда: «Кеч къалама, не зат эсе да унутама, ахча, саугъала, къаллай аш этейим...»,- деген соруула башыбызны хайран этгендиле. Дагъыда  солууну биягъы хайырсыз, керексиз ётдюребиз деп къайгъырабыз.  Алай бла уа ишге солумай,   арып чыгъарыгъыбыз къоркъуулуду, - дейди КъМР-ни Саулукъ сакълау министерствосуну Психиатрияны бла наркологияны клиника арасынды  психиатры, психотерапевти Залина Бейтуганова.

Алай болмаз ючюн а, юйренчек  жорукъланы сындырыргъа керекди, дейди психиатр. «Жаланда юч атлам, алай ала солуу кезиуде кюч табаргъа, жангы жылда хайырлы болургъа юйретирикдиле»,-дейди ол.

Алай бла, биринчиден, жууукълагъа барысына да барыргъа, заманны зауукълу ётдюрюрге, чанада учаргъа керекди, деген борчланы унутугъуз. Энчи кюнню бёлюп, аны эркинчекликге, жукъ да этмеуге жоралагъыз. Мыйыгъыз, нерваларыгъыз эригирге керекдиле.  Ол а психогигиенаны эм уллу амалыды, деп юйретеди бизни ушакъ нёгерибиз.

Экинчи атлам: дофаминни тазалау! Адам не ууакъ затлагъа да къууана билирге керекди. «Зауукълукъну, къууанчны сезер ючюн, кёпден-кёп информация, неда татлы ашарыкъла керекдиле дегенни унутугъуз. Бир кесек акъырын болугъуз: жаланда бир мандарин, учундургъан, къууандыргъан ушакъ -  алай бла аз, ууакъ затланы татыуун ангылап, сезип башларыкъсыз»,-дейди Залина Руслановна.

Бир-бир экспертле жангы жылда кесигизге 10 уллу борч салып, аланы толтурургъа итинигиз, деп юйретедиле. Алай ол артыкъ хайырлы болмагъанын айтады психиатр. Алагъа жетишмесек, адам къайгъылы болады, жарсып башлайды.

- Андан эсе жангы жылда не зат сезерге сюеме, деген сорууну салыгъыз. Ышыннгылылыкъ, женгиллик, учунуулукъ. Аланы не заманда, къаллай ишледен, болумладан сезесиз? Ма аладыла жангы жылда сизни таянчагъыгъыз. Бюгюн къаллай сайлау этсегиз, жангы жыл да алай ётерикди: арыгъан, жукъдан да къууанмагъан адам болуп, неда мыйыгъызны, акъылыгъызны тазалап, жангырыпмы.  Солуу мыйыгъызны тазалаугъа иги кезиудю, андан хайыр алыгъыз,-дейди Залина Бейтуганова.