Байрам аракъысыз да жарыкъды

Жангы жылны байрамына хазырлана, бирле кеф этдирген ичгисиз болалмайдыла.  Алгъын бизге аракъысыз солуу толу тюйюлдю, чагъырсыз къууанч жарыкъ болмайды, деген терс ниетлени сингдирирге кюрешгендиле. Алай заман тюрленнгенди. Бюгюнлюкде   керти эркинлик адамны башын хайран этген затланы, аракъыны, наркотиклени  ичмесенг сезилгенин ангылагъанды халкъ. 

Врач психиатр-нарколог, КъМР-ни Саулукъ сакълау министерствосуну Психиатрияны бла наркологияны республикалы клиникасыны баш врачыны орунбасары Резуан Бетуганов бизге ангылатханыча, адам къолуна алгъан  хар стакан да аны артха элтеди, муратларын унутдурады, жашлыгъын, ариулугъун бузады.  

- Аракъы эм багъалы затны – саулукъну  жокъ этеди. Ол къаллай ауруула къозгъагъаныны юсюнден кёп айтылады. Алай санларын бузгъан бла бирге  аны жамауатдан айырады. Ичген адамны жууукълары, танышлары, нёгерлери жокъдула. Аны жаш адамларыбыз ангылап, жашауларында керти да магъаналы затланы сайларгъа чакъырама – спортну, билимни, илмуну, маданиятны, китапланы, айныугъа элтген башха затланы, - дейди Резуан Бетуганов.

 Сабийге, бютюнда акъылбалыкъ болмагъаннга, акъылы, психикасы къатмагъан кезиуде  ата бла ана жашауунда эм уллу юлгюдю. Байрамны кезиуюнде юйде аракъы тауусулмагъанын, таматала эсирип, кеслерин тапсыз жюрютгенлерин кёрген бала, ёсе баргъанда, быллай «байрамлагъа» юйренчек болуп, алада бир тюрлю хата кёрмей къалады.  

Аракъыгъа, наркотиклеге угъай деген, жашаууну иесиди, оноуланы кеси чыгъарады. Аны себепли жарыкъ, тири, аракъысыз жашауну сайлагъыз, бютюнда байрам солууну кезиуюнде!