Урунургъа тап онгла

КъМР-ни Саулукъ сакълау министерствосундан билдиргенлерича, быйыл жыл башланнганлы «Земский доктор/ фельдшер» къырал программагъа кёре 35 медицина ишчи урунургъа онг тапхандыла. Ала 27 врач бла 8 орта усталыкълары болгъанладыла. Алай бла программаны чеклеринде регионнга салыннган борч толтурулгъанды.  Медикле Элбрус,  Зольск, Лескен,  Май, Басхан, Урван эм Прохладна районлада ишге тохташхандыла.

Эсге сала айтсакъ, Къабарты-Малкъарда программа 2019 жылдан бери ишлейди. Ол кезиуге тюрлю-тюрлю профильли 244 специалист жетишимли уруннганларын да энчи белгилерчады.

Ишлерге эл жерлеге баргъан врачлагъа бир миллион сом тёленеди. Фельдшерге, акушерге эм медсестрагъа уа – 500 минг сом. Аны бла бирге,  эл бек узакъда орнала эсе, ахчаны ёлчеми 1,5 миллионнга эм орта персоналныкъы уа 750 минг сомгъа жетеди.

Программаны магъанасы медицина ишчиле узакъ эллеге бла гитче шахарлагъа тартылырча этергеди эм жетмеген кадрла бла жалчытыргъады. Ол шарт район арадан кенгде жашагъанлагъа да тийишли медицина болушлукъ алырча ахшы себеплик этерикди.