Жетишимни ёзеги – хунерлик бла талпыныулукъ

Озгъан ыйыкъда «Простуденчество»  регион форумну чеклеринде саугъалагъа тийишли болгъанланы белгилегендиле. Аланы санында  Османланы Жамиля да барды. Ол «Маданият – жарыкъландырыу» «Малкъар хазнасы» деген проектин хазырлагъанды. Бюгюн биз аны  юсюнден хапар айтырыкъбыз.

- Жамиля,  форумну эмда проектни юсюнден къайдан эшитгенсе?

- Черек районну проект ишле бла байламлы специалисти Бапыналаны Шахризада кёллендиргенди мени ол конкурсха къатышыргъа. Ол юйретген, ангылатхан халда ишни тамамлап, проектлени сюзген комиссиягъа алай берген эдим.

- Бу биринчи проектингмиди? 

- Къашхатауда жаш тёлю ара ачылгъанлы эмда мен проект ишлени юслеринден хапар билгенли,  бир ненча  проектни хазырлап, конкурслагъа къатышханма. Сора алада белгиленнген кемчиликлерин тюрлендирип, игилендире тургъанма. Болсада, грантха тийишли болуп, грамота алгъан биринчи проектимди.

- Анга сейир ат да бергенсе. Аны юсю бла тамамларгъа мурат этген жумушларынгы белгилесенг  эди.

- Проектни аты аны болушлугъу бла тамамларгъа итиннген кемчиликле бла байламлыды. Шёндюгю  жаш тёлю ана тилин, миллетини адет-тёрелерин, маданиятын иги билмейди. Мен хазырларыкъ форумну проекти тилни сакълау бла байламлыды.

Андан тышында да, къарачай-малкъар тилге кёчюрюлген фильмлени, анимация киноланы, 8 мартда кёчгюнчюлюкню юсюнден фильмни жаш тёлюге кёргюзтюрге умут этеме. Ызы бла,Черек районда чатырладан лагерь къурап, тёрт кюнню ичинде жаш тёлюню агъач, таш бла ишлерге, кийиз согъаргъа юйретир умутубуз барды. 

Дагъыда, уста тепсеучюлени чакъырып, миллетибизни адетлери бла байламлы той къураргъа, оюнланы кёргюзтюрге, Къарачай-Черкесден бла республикабыздан усталарын, алимлерин чакъырып, жарыкъландырыу программаланы, Уллу Ата журт урушну жылларында къазауатла баргъан жерледе лазертагны (лазер жарыкъ берген ушкокла бла оюнну) бардырыргъа, ахырында Мечиланы Кязимни Шыкъыда юйюне жолоучулукъ къураргъа акъыл этеме. 

- Миллетибизни хазналарын энчилеп, форум бардырыргъа къалай келгенди акъылынга? 

- Аз санлы миллет болгъаныбыз себепли аны бай  хазналарын (ала заман узая баргъан къадарда унутула, тас бола барадыла) сакълаугъа юлюшюмю къошарма деп, бу ишни къолгъа алгъанма эм проектими тамам этер умутум барды.

- Проектинги хазырлагъанда, къоруулагъанда эм къыйыны не эди? 

- Аны конкурслада жаратырча, бек аз этиллиги къалгъанын кёрюп тургъанымлай, жангыдан тюрлендирип чыгъаргъан манга къыйын эди. Болсада тёгерегимдегимде адамларым  кёллендирип, умутуму юзмезге болушхандыла. Проектни къорууларгъа чыкъгъанда, бираз абызырап, кёп затны белгилерге унутама. Экспертле, аны ангылап, жангыдан  къорууларгъа онг бередиле.

- Юйюрюнгде уа не айтхандыла? 

- Атам бла анам, бютюнда атам, менден эсе бек къайгъы этип тургъандыла. Телефон бла алагъа сёлешгенимде, мудах ауаз бла башлагъан эдим, алай олсагъат хорлагъанымы айтханымда, атамы биринчи сёзю: «Оллаха», - болгъанды. Ала чексиз къууаннган эдиле. Баям, аланы билеклик этиулери,  кёллендириулери болмасала эдиле, бир ишими да тамам эталлыкъ болмаз эдим. Аланы ол халлары жетишимли болургъа болушханды. Мен алагъа чексиз ыразыма. 

- Бу проектни ахырына жетдирсенг, жангыдан къолгъа алырча ишни юсюнден сагъыш этемисе? 

- Проектге къатышханлагъа билеклик этип кёллендирселе, мындан арысында да миллет хазналарыбызны не амал бла да сакъларгъа кюч саллыкъма. Ишни кесим сюйгенча хайыры барды деп эслемесем да, жаш тёлю миллетибизни маданиятын тинтирге, сакъларгъа тартылырына себеплик этиуден артха турлукъ тюйюлме.