Хар кимге да хайырлы ашарыкъланы тизмеси

Бу ыйыкъны Россейни Саулукъ сакълау министерствосу  адамны санларына, мыйыгъа жараулу аш-сууну  юсюнден билимни кенг жайыугъа жоралагъанды. Аны чеклеринде КъМР-ни Психиатрияны бла наркологияны республикалы клиника арасыны медиклери адамгъа хайырлы ашарыкъланы тизмесин къурагъандыла.

 - Мыйыны саулугъу ашха кёре болгъанын илмуда эртте тохташдыргъандыла. Тюз, саулукъгъа хайырлы ашарыкъла адамны халин, эслилигин игилендиредиле, стрессни азайтыргъа себеп этедиле. Бу ыйыкъны чеклеринде уа окъуучулагъа ашларына къошаргъа керекли беш продуктну юсюнден айтыргъа сюебиз,-дегендиле бизге клиниканы пресс-службасындан.

Алай бла бек алгъа ашха  чабакъны къошаргъа керекди.  Ол   омега-3   кислотадан бай болгъаны барыбызгъа да белгилиди. Ол а  адамны мыйысыны клеткаларын къурайды. Чабакъ, бютюнда аны жаулу тюрлюлери, кёп тюрлю аурууладан сакъланыргъа болушурукъду.

Ачы шоколад – къурамында какаону ёлчеми 70 процентден кёп болургъа керекди. Какаода   флавоноидле, антиоксидантла бла  кофеин асламдыла. Бу затла уа мыйыны къан бла жалчытыуну игилендиредиле, адамны эсин къатыландырадыла. Дагъыда шоколад адамны кёлюн кётюреди, анга халкъда «ырахматлыкъны гормону» дейдиле. Алай асыры оздурмагъыз – кюннге   1-2 кесекчиги тамамды.

Къара ишхилди, голубика, мароко уа саулукъну керти хазнасыдыла. Ала   антиоксидантла бла байдыла,  стрессни хорларгъа болушадыла, дагъыда мыйыны къартайыудан сакълайдыла. Наныкъла нейрон байламлыкъланы кючлегенлерин айтадыла алимле.

 Шпинат, кале, руккола дегенча хайырлы кырдыкланы къурамында К, Е, А витаминле, фолиевая кислота бла  лютеин бардыла. Ала уа мыйыны сакълайдыла, адамгъа терк сагъыш этерге, оноула чыгъарыргъа себеп этедиле.  

 Къоз, миндаль, чертлеуюк мыйыны «батарейкасыды». Алада да  омега-3,  витамин Е эм антиоксидантла асламдыла. Ала адамгъа кюнню узунуна тири болургъа болушадыла.

-  Бу ашарыкъла хар юйде да бардыла, аланы тапхан къыйын тюйюлдю. Санларыгъызны, мыйыгъызны кючлеген, психикагъызны игилендирген ашарыкъланы сайлагъыз.  Кесигизни, мыйыгъызны да аурууладан сакълагъыз, узакъ ёмюрлю болугъуз,-дегендиле бизге клиниканы пресс-службасындан.