«Усталыгъынга жюрегинг бла берилсенг, ол санга махтау келтирир»

Кюн сайын больницаны хирургия бёлюмюнде иш танг атханлай башланады: операцияны кезиуюнде хайырланылгъан инструментлени тауушлары эшитиледиле, дарман ийис бурунунга урады, коридорда уа  акъ халатлыла ары-бери ашыгъышлы жюрюйдюле.

Мында саусузгъа биринчи тюбеген, операциядан сора аны ашыргъан да постдагъы медсестрады. Ол, медицина ишчиледен бирлери болуп къалмай, бёлюмде кёп жумушну тамамлагъан, аны къой – саусузлагъа кёл этдирген  адамды. Гузоланы Фатима ма аллай медсестрады. Ол Нальчик шахарны республикалы клиника больницасыны хирургия бёлюмюнде талай жылдан бери ишлейди. Бюгюн ол бизни ушакъ нёгерибизди.

– Фатима,  хирургия бёлюмде ишлеп башлагъан кюнюнг эсингдемиди? 

– Бюгюнча, эсимдеди. 1996 жылда декабрь айда кирген эдим ишге. Ол кюн  хар узалгъан  ишиме асыры уллу магъана бергенимден, абызырап, билгеними да унутханнга ушай эдим. 
Больницада къалгъан биринчи кечем да эсимдеди. Бир къыйын саусуз тюшюп, сау кече бёлюмде ишлегенле барысы да аягъы юсюне тургъанча ётген эди. Болсада эрттенликде саусуз, бираз жайыгъып, къарамы бла бизни барыбызны да жокълай ышаргъанын кёргенимде,  бу эм керекли иш болгъанын, бёлюмде къалыргъа сюйгениме тюшюнеме.

– Усталыгъынгы уа къалай бла сайлагъанса?

– Сабийлигимден да медик болургъа муратым бар эди. Жашаугъа ышаныулукъ къайтаргъаннгача къарагъанма саулукъ сакълауда ишлегенлеге. Аны кеси юсюмде да сынадым, ол себепден сайлауума бир кюн да сокъуранмагъанма. 

– Ишингде бек къыйын неди?

– Не жашырлыгъы барды, ишибиз тынч тюйюлдю, алай аны бек къыйыны – саусузланы къыйналгъанларын кёрюудю. Ол заманда жюрегинг бек ачыйды. Жаланда бетлери жарыгъанда кетеди ачыгъаны.

– Ишде кюнюнг къалай ётеди? 

– Эрттенликде биринчи болуп, палаталагъа айланып, халгъа къарайма, ауругъанланы халларын сорама, ызы бла врач келирге хазырланама – хар затны шарайыпсыз хазырлыкъда тутаргъа борчлума. Жангылыргъа арталлыда  жарамайды, хар жумуш да адамны саулугъу бла байламлыды. Ол себепден ишибизге жууаплы кёзден къараргъа, тёзюмлю болургъа, жан аурута билирге керек болады. Бирде жапсарыу сёз дармандан да багъалыды. 

– Ишингде эм жууаплы кезиуледе сизден не изленеди?

– Бизде эм жууаплы кезиу саусузну онгсуз болуп келтиргенлериди. Ол заманда анга мычымай эс тапдырыу бек жууаплы жумушду: апчымай, жунчумай, керекли мадарла этерге, врачны буюрууларын шарайыпсыз толтурургъа, аны къой – саусузну къатында жууукъ адамына жапсарыр сёзле табаргъа. 

Бирде саусуз операциядан сора жайыгъып, игиди деп къууаннгынчы, халы бир  такъыйкъаны ичинде тюрленирге болады. Ол заманда саусузну кесинеми, къатында адамынамы болушлукъ бегирек изленеди. Бизни борчубуз жунчумай, гузаба этмей, керекли амалла табыуду. Медицинада усталыкъ эмда билим, сынам бла бирге сабырлыкъ да керек сунама. 

– Таматаларыгъыз а, ишигизни жууаплылыгъын ангылап къайгъырамыдыла, болушлукъ этемидиле? 

– Мен ишлеген бёлюмню таматасы Шамаев Заур Мурадинович бийик усталыгъы болгъан, низамны къаты сурагъан, аны бла бирге уа ишчилерине, саусузлагъа да къайгъыра билген адамды.  Айхай да, аны иши бек жууаплыды. Ол харкюнлюк ишибизде буйрукъла, эсгертиуле береди,  ишни юсюнде не тюрлю болумдан  да къутулууну тап амалларын табаргъа кюрешеди, саусузлагъа, ишчилеге да  иги болумла къурарча онгла излейди. Аны уста башчы болгъаныны хайырындан бёлюмде ишлегенле, бир юйюрню адамларыча, бирлешип урунабыз.  Ол излегенча, ишибизни саусузланы ыразы этерча тамамларгъа итинебиз. 

Биргеме ишлегенле да жууаплы, къайгъырыулу эмда билимли адамладыла. Жаболаны Халимат, Мида Багова, Мадина Апшева, Хучиналаны Асият, Мадина Карданова ишлерине жюреклери бла берилген къызладыла. Бизге саусузну ыразылыгъындан уллу саугъа  жокъду. 

– Фатима, сен тёрт сабийни анасыса. Аны не ючюн сагъынама: ишинг кече дежурствола бла байламлыды. Къалай жетишаласа юйде, ишде да?

– Анам, къарындашым да иги онг тапдырадыла. Ала билеклик этмеселе, сабийлени кече бла къоюп хазна кеталлыкъ тюйюл эдим. Сабийлени ёсдюрюуде къыйынлары уллуду. Аны ючюн алагъа бек ыразыма. 

– Бу усталыкъны сайлайма деген жаш адамлагъа не айтыргъа сюесе?

– Медицинада не усталыкъны алып къарасанг да, хар бири  заманны, билимни, тёзюмню, жюрек халаллыкъны излейди. Къысхасы, медик уллу жууаплылыкъны излеген усталыкъ эсе да, бек кереклиди эмда огъурлуду. Аны жюреги бла  сайлагъан, анга хунери болгъан адам къоркъмазгъа керекди, артда адамладан ыспас табарыкъды.