Къолу чемерге не зат да тынч берилир

«Адамла хапчукланы угъай, сезимлени сатып аладыла», - деп жазылады Хутуйланы Магометни къол усталыкъ бла кюрешген отоуунда къабыргъада тагъылгъан  терини  юсюнде. Керти да, бу жаш этген аберилеге къарасанг, ала жаланда жылы, жарыкъ сезимле туудурадыла. Алай болмаз амалы да жокъду, нек дегенде, адам сюйюп этген затха кёлюнден, жюрек жылыуундан да  юлюш этмей  къоймайды.

Магомет Быллымда жашайды. Жарыкъ кёллю, къонакъбай  болгъаны тюбегенлей окъуна сезиледи. Ол ишин бардыргъан отоу арбазны бир жанында орналыпды. Ары киргенибизде, усталыкъны жылы тылпыуун олсагъат сезгенбиз. Узунуна – ишчи столу, керекледен толу орунлары, къабыргъада къанга тапкачыкълада ууакъ-тюек бичакъла, бизле,  тери журунла, оймакъла, къыптыла... Сол жанында саулай къабыргъаны уа, баям, терен тарыхы болгъан таулу кийиз алады.
Ангылагъан болурсуз, жангы танышыбыз  териден абериле этиучю устады: хуржунла, бел баула, бохчала, орунла, къалпакъла окъуна. Ишине уллу кёл салып берилгенине къарасанг, андан ол затланы излегенле табылгъанларына ишекли боллукъ тюйюлсе.

- Мен усталыгъымы, этген затларымы юсюнден халкъгъа артыкъ билдирмейме, - дейди жаш,  ышара.  - Тюзюн айтханда, алай эте да билмейме. Ишим ма буду – къолумдан  келген зат бла кюрешиу.
Болсада Хутуйланы Магометни усталыгъыны юсюнден къуру элинде угъай, башха жерледе, тыш регионлада да эшитгендиле.

- Бирле танышлары кёрюп айтхан бла табадыла мени, башхала уа Интернетде кёрюп   сёлешедиле, жазадыла. Ким да болсун, барына да эс бурама, къайишден не зат этилсе сюйгенлерин толуракъ ангыларгъа кюрешеме. Адам  излемине  арсарлы болмаса,  манга да ишлеген женгилди. Башхалагъа уа кесим да оюмуму айтама, ала бла бир затха келишеме. Ол да къыйын тюйюлдю. Къайсыларын да бирча сюйюп этеме, алай ары дери кёрмеген неда къолгъа алмагъан аберилеге уа сейирим бютюнда уллу болуучуду.

Магомет  тери  бла кюрешип башлагъанлы алай кёп да болмайды.

- Ийнанамыса, мен кесими билгенли,  гитчелигимден окъуна,  къол бла абери этерге сюе эдим: къанжалдан орунчукъла, ызы бла бичакъла. Артда аланы санга телефонда кёргюзтюрме. Талай жыл мындан алгъа уа къайиш бла кюрешиуге тюшюнюп, анда  хунерими тапханма дейим.

Бу усталыкъгъа бир жерде да окъумагъанма, аз-аздан кесим юйреннгенме, бирде терс, бирде тюз  эте. Жукъ да этмеген жангылмайды, аны себепли мен ол затлагъа тюз къарайма. Инструментле мажарып, кеслерин да  эм игилерин, тери, халыла, фурнитура да сатып алып башлагъанма. Биринчиден, Пятигорскде бир энчи тюкенчик барды да, ары барыучу эдим. Энди уа хар нени да кёбюсюнде  Интернет бла  алып къояма.

Ол айтханыча, шёндю,  къуру бизни къыралдан угъай, Къытайдан, Тюркден да терини  кёп тюрлюсюн табарыкъса. «Бек аламаты уа Италияданды, багъасы да анга кёре болады. Алай кесибизникиле да арт кезиуледе сейирсиндирип башлагъандыла, ийнан, качество дегенни къолгъа алгъандыла; аллай териден  сатыугъа, саугъагъа окъуна аберилени айыпсыз ишлерге боллукъду», - дейди уста.

Къайсы ишдеча, тери бла кюрешиуде да жангычылыкълагъа, башхала этген затлагъа эс буруп турургъа  тийишлиди. Хар устаны кесини тасхалары, амаллары боладыла. Магомет да артха къалмайды, излейди, тинтеди, сорады.

- Бир сейир хапар айтайым. Интернетде бир уста, испанлымы эди ол, огъесе бразилиячы – эсимде тюйюлдю, тикгичле бла кюрешеди, тасма тикгичле бла. Бек аламат этеди: бел баула, башха затла да. Ишин видео бла кёргюзте,  тери журунну бир гитче затчыкъ бла тартып, олсагъат тюппе-тюз тасма алады. Бек сейир этеме да, анга тюзюнлей тауча: «Бу аламат зат неди? Аны манга сат. Болмаса уа, юйрет», - деп жазама. Ол а мени сёзлерими тюрк неда къазах тилгеми кёчюрген болур эди, ангылап: «Мен санга аны сатып этеригим жокъду, алай  юйретген а этейим»,- деп, жууабын жибереди. Ол айтханлай этип, ол аламат затчыкъны къурайма да, терини бир тартханлай, бек тап кесгенин кёреме. Къууанама, ол адамгъа жазып билдиреме, кесин да бери къонакъгъа чакъырама.

- Тери бла кюрешиуню мен бек жаратама, - дейди Магомет. Ол кимни да къолундан келирге болур, алай анга сюйюп узалмасанг а, ишинг барлыкъ тюйюлдю. Кёпле иш терк айнып, алыучула да кёп болуп башласа сюедиле. Алай а болмайды. Адамла сени таныргъа, билирге керекдиле, анга уа заман керекди. Мен бу усталыкъ бла он жыл чакълы кюреше болурма, алай ишим а кёп болмай барып башлагъанды. Алай бла энди ол, мен да бирге айный, ёсе барырбыз, деп ышанама.