«Бизни барыбызны да тюзлюкге къуллукъ этгенибиз бирикдиреди»

Ботталаны Жамал экономика илмуланы кандидатыды, Къабарты-Малкъар къырал аграр университетде преподаватель болуп иги кесек заманны ишлегенди. Дагъыда жетишимли предпринимательди: аны «Ай-РайяН» деген белги бла чыгъарылгъан айранын кёпле жаратып алгъандыла. Бюгюнлюкде уа Жамал энчи аскер операцияда къуллукъ этеди, ишин, тынчлыкълы жашауун да къоюп, кеси ыразылыгъы бла  Ата журтну сейирлерин къорууларгъа кетгенди.

Аскер къуллугъун а «Эрзи» батальонну санында бардырады. Бу аскер биригиу Россейни Президентини Шимал-Кавказ федерал округда толу эркинликли келечиси  Юрий Чайканы башламчылыгъы бла Ингушетия Республикада къуралгъанды.  «Эрзи» деген ингуш тилден «къуш» деп кёчюрюледи.  

Кёп миллетлени келечилери къуллукъ этген шуёх батальоннга Ахмет Котиев башчылыкъ этеди. Аны борчу - эркин этилген жерлени аманлыкъчыладан тазалау эмда  тинтиуле бардырыу. 

Ботталаны Жамал гитчелигинден окъуна да билимли болургъа, халкъына  хайыр келтирирге итиннгенди. Мектепде айырмалы окъугъанды, аны битеу ишлерине тири къатышханды. Тюрлю-тюрлю олимпиадалада, конкурслада  да атын айтдыргъанды.  Алай бла аны жашау жолу кеси аллына къуралып къалмагъанды. Къолгъа алгъан хар не ишни да ол, терен оюмлап,  алай тамамлагъанды.

2013 жылда жаш Къабарты-Малкъар къырал аграр университетни да  жетишимли бошайды, кёп да бармай а, кандидат диссертациясын да къоруулайды. Бусагъатда доктор диссертациясын да къорууларгъа хазырлай турады. Ол эллиден артыкъ илму ишни авторуду, аскер къуллугъун да толтура, Россей Федерацияны Президентинде Россейни халкъ мюлкюню эмда  къырал службаны академиясыны магистратурасында  къырал къуллукъ эмда кадрла политика жаны бла билим алады. 

Тирилигини, билимлилигини хайырындан Ботта улу Къабарты-Малкъар къырал аграр университетни студент советини башчысындан башлап Билим бериу  эмда илму жаны бла  федеральный агентствону федерал инспекторуну къуллугъуна дери кётюрюлгенди эмда КъМР-ни Жарыкъландырыу эм илму министерствосуну жамауат советине да айырылгъанды.

Жамал алыкъа жашды, алай кёп ишни башламчысыды. Аланы араларында, башда айтханымча, «Ай-РаяН» фирма, «Лазурный» жашау комплекс (ол аны  председателиди), «Империя комфорта» ООО (аны баш директоруду) да бардыла.

Сёзсюз, Жамалны республиканы экономикасын айнытыугъа уллу юлюш къошханы эсленмей къалмагъанды. Аны саугъалары, белгилери да кёпдюле. Аланы араларында  КъМР-ни Башчысы Казбек Коковну  саугъасы да барды. Анга аны республиканы оноучусу  саулукъгъа жараулу таза ашарыкъ чыгъаргъаны ючюн бергенди. Дагъыда Ботта улу Шимал-Кавказ федерал округда  «Эл мюлкде эм иги жаш  ишчи» деген атха да тийишли болгъанды.  

Бу адам, сёзсюз, кесине башда айтылгъанладан эсе да уллу къырал къуллукъ  табарыкъ эди, предпринимательлик ишде да жетишимли боллукъ эди, болсада, аз да арсарлы болмай, СВО-гъа кетгенди. Ол кеси айтханыча, анга, тау адет-тёреледе  ёсген жашха, Ата журтну къоруулау –  сыйлы борчду.

- «Эрзи» батальонда Шимал Кавказдан кёп миллетлени, динлени  келечилери къуллукъ этедиле,- дейди Ботталаны Жамал.- Бизни барыбызны да тюзлюкге къуллукъ этгенибиз  бирикдиреди. Биз мында миллетлени айырмайбыз, бир юйюрню жашларыча къарайбыз бир бирге, сауут къарындашлабыз. Барыбыз да Россей деген уллу юйюбюзню эмда аны адамларын къорууларгъа таукел сюелебиз.