Эрттегили адетлени эсге сала

Нальчикде 29-чу гимназияда окъугъанла  устазлары бла бирге тюрлю-тюрлю  ишле бардырадыла. Ала асламында таулуланы, къабартылыланы, оруслуланы бурун заманлада жашауларына, тарыхларына жораланадыла. Алай бла бу кюнледе алада «Чемоданда музей» деген ат бла класс сагъат ётгенди. Аны бу жол алтынчы классны окъуучулары Азаматланы Амир бла Мелена Ажуева бардыргъандыла. Ала эм иги окъугъанладан бирлеридиле, мектепни хар ишине да тири къатышадыла.

Амир спортну карате тюрлюсю бла да кюрешеди, кёп кере республикалы,  регион эришиуледе да хорлап, майдалла, кубокла да къоллу болгъанды. Аны бла да чекленип къалмай,  тюрлю-тюрлю  эришиулеге, олимпиадалагъа да къатышып, атын айтдырады.  

Ол кюн класс сагъатха  къатышханланы ишлеринден кёрмюч да къуралгъанды. Аланы араларында бурун заманладан таулула эмда къабартылыла, оруслула къолда жюрютген адырланы, кийген кийимлени, дагъыда башха затланы кёрюрге боллукъ эди. Аланы юслеринден Шалушкадан Азаматланы Амир бла  Нальчикден Мелена Ажуева хапар айтхандыла.

Амир бла аны анасы Лейля  эрттегили гыранчаны  юсюнден сейир шартла келтиргендиле.  Ол гыранча жаулукъну онтогъузунчу ёмюрню башында Шыкъыда жашагъан Сюйдюмланы Шахийдат тикгенди. Ол Амирни ыннасыны ыннасыды. Къолдан уста таулу тиширыу кесини заманында аллай гыранчаланы иги кесегин тикгенди. Сора  эрге чыкъгъан къызлагъа саугъалагъанды. 

Жаулукъну Орта Азиягъа да элтип къайтаргъандыла. Аны иелери, ачлыкъ, жаланнгачлыкъ сынагъанларына да къарамай, сатмагъандыла, кюбюрде асырагъандыла. Бюгюнлюкде да гыранча бетин тас этмегенди, кёп къызла тойларында аны башларына атып чыгъадыла. Ол бурун заманладан къала келген  насыпны, берекетни, юйюр жылыуну белгисиди. Аны къысхан къызла барысы да баргъан жерлеринде насыплы жашау этедиле.

«Чемодан музейде»  дагъыда  Амирни  атасы Рашитни майдаллары, Элбрус районда уголовный розыскда  къуллукъ эте, бандитлени тута туруп этген жигитлигини,  ауур жаралы болуп аскер госпитальда жатханыны, анда врачла аны аягъы юсюне салыр ючюн къалай кюрешгенлерини юслеринден  жазылгъан статьяла бла  «Кабардино-Балкарская правда», «Заман» газетле да бар эдиле. Жаш тукъум терекни суратын да ариу жарашдырып ишлегенди.

Кёрмючде 150 жыл мындан алгъа ишленнген кюмюш сынжырны  да кёрюрге боллукъ эди. Аны дагъыстанлы уста ишлегенди. Аны тарыхыны юсюнден  Мелена Ажуева билдиргенди. Ыннасына аны аппасыны атасы саугъагъа бергенин, ол а туудугъуна къойгъанын да  айтханды.

Таулу адетге кёре кюбюрню, чемоданны башын ачханда, аланы ичлеринде болгъан затладан  отоудагъылагъа  юлюш чыгъарылады. Класс сагъатны  ахырында  Азаматланы Амир тенглерине татлы затладан хуржунчукъла жарашдырып  юлешгенди.
Ахырында уа  гимназияны  директоруну орунбасарлары Марина Алёхина, Сусанна Карачаева, Нальчик шахарны администрациясыны  билим бериу департаментини бёлюмюню башчысы  Светлана Калибатова Амирге бла Меленагъа ыспас этгендиле, аланы  проектлери республикалы конкурсха къатышыргъа керек болгъанларын да айтхандыла.