Жолланы – тохташдырылгъан мардалагъа

«Жашау этерге инфраструктура» миллет проектге кёре келир жылда Къабарты-Малкъарда жолланы 73 километрден асламында 10 объект бла эки кёпюр жангыртылып, мардалагъа келиширча боллукъдула, деп билдириледи КъМР-ни Транспорт эмда жол мюлк министерствосуну  пресс-службасындан. Алгъадан келишим этилгени себепли келир жылны башында окъуна жоллагъа тынгылы ремонт этип  башларыкъдыла. Аны кезиуюнде тийишли ишле къыралны магъаналы жолларында, элледе эм Нальчик  шахар округда да тамамланыллыкъдыла. 

Эм уллу объектге стратегия магъанасы болгъан Новопавловск–Прохладный–Моздок трассаны санаргъа боллукъду. Мында ишле быйыл окъуна башланнгандыла.  Аны бла бирге келир жыл Къабарты-Малкъарны,  Ставрополь крайны эм Шимал Осетияны бирге къошхан жолда да 7 километр тенгли бири жангыртыллыкъды.  Ол санда  Первомайское орамда 250 метр чакълы бирде кёпюрню  кючлеуге  эм къоркъуусузлукъну да жалчытыугъа   аслам эс буруллукъду. Аны, районда жашагъанладан  тышында, бирси регионлагъа баргъанла да  аслам хайырланадыла.   Бюгюнлюкде мында тийишли ишле башланнгандыла.  

Андан сора да, Черная Речка – Благовещенка жолну да 12,7 километри жангыртыллыкъды.  Дагъыда келир жыл Кичибалыкъны ичи бла ётген Малка–Ингушли жолгъа тынгылы ремонт этилликди.  Хамидиеде, Сармаковода жолла эм Нальчик–Майский трасса да мардалагъа келиширча боллукъдула. 

Сагъынылгъан кезиуде жангыртыу ишле  2019 жылда  башланнган Псыгансу бла Эски Черек эллени къатлары бла ётген  Черек–Жемтала–Сукан-Суу жолну къалгъан кесегин бошарча мадар этилликди. 

Мында, жолну башы бла ётген кёпюрден сора да, Терк сууну Прохладный–Эльхотово трассада Май бла Терк районланы байлагъан  кёпюрю да жангыртыллыкъды. 

Эсге сала айтсакъ, келир жыл эм магъаналы объектледен бири Экинчи Чегем–Булунгу жол да хайырланыргъа берилликди.  Бусагъатда мында ишле 25 километр тенгли бирде барадыла: жолчула жолланы мурдорларын кючлейдиле, жардан таш, топуракъ оюлмазча бетондан хунала,  жауун саркъырча быргъыла саладыла. Бюгюнлюкде биринчи къат асфальт салып бошагъандыла. Къалгъан ишле жылыла келгинчи тохтатылгъандыла.